Біскуп Пінскі Антоні Дзям’янка ў апошні час здзейсніў новыя прызначэнні сярод біскупаў і святароў, якія служаць у Пінскай дыяцэзіі.

Яго Эксцэленцыя Біскуп Андрэй Зноска, дапаможны біскуп Пінскай дыяцэзіі, з 13 верасня прызначаны Генеральным Вікарыем Пінскай дыяцэзіі;

Айцец Сяргей Калюта OSPPE з 22 верасня вызвалены з пасады вікарыя парафіі Унебаўзяцця Найсвяцейшай Панны Марыі ў Гомелі (Гомельскі дэканат);

Айцец Ануфрый Альховік OSPPE з 22 верасня прызначаны на пасаду пробашча парафіі Спаслання Духа Святога ў Пінску (Пінскі дэканат).

Да вернікаў Пінскай дыяцэзіі

Умілаваныя ў Хрысце браты і сёстры!

     28 кастрычніка 1925 г. Папа Пій ХІ заснаваў Пінскую дыяцэзію. Рыхтуючыся да адзначэння гэтай юбілейнай даты ўсёй супольнасцю мясцовага Касцёла, мы распачынаем год падзякі Міласэрнаму Богу за ўсе Яго ласкі, якія нашая дыяцэзія атрымлівала на працягу гэтых ста гадоў. 

     28 верасня бягучага года а 11-й гадзіне жадаем распачаць святкаванне сотай гадавіны заснавання Пінскай дыяцэзіі ў мястэчку Ружаны. Божы Провід дазволіў аднавіць там велічную капліцу Святога Казіміра, якая была ўзнесеная ў XVIII ст. у памяць пра перанясенне і захаванне ў Ружанах рэліквій гэтага святога нашай зямлі.

     Таму запрашаю ўсіх вас прыняць удзел у Святой Імшы ў ружанскай капліцы Святога Казіміра ў апошнюю суботу верасня. Падчас літургіі адбудзецца асвячэнне адноўленай святыні, а таксама ўсе разам узнясём да Бога малітву падзякі за ўсе Яго дары, якімі Ён не перастае шчодра благаслаўляць Пінскую дыяцэзію.

     У межах Ружанскага фэсту, з якога распачнём святкаванне стогадовага юбілею дыяцэзіі, кожны з нас будзе мець асаблівую магчымасць дакрануцца да вялікай духоўнай і гістарычнай спадчыны Касцёла на нашай зямлі. На гэтай урачыстасці мы станем не толькі сведкамі, але і ўдзельнікамі шэрага гістарычных падзей: асвячэння адрэстаўраванай святыні ў гонар святога Казіміра і адноўленага ўнікальнага старадаўняга аргана ў парафіяльным касцёле Найсвяцейшай Тройцы. Таксама пазнаёмімся з гісторыяй Пінскай дыяцэзіі, станем сведкамі гістарычнай рэканструкцыі захавання рэліквій святога Казіміра і будзем мець магчымасць памаліцца пры яго аўтэнтычных рэліквіях. Нашая моладзь падрыхтавала прыгожы канцэрт праслаўлення Пана Бога, які адбудзецца ў непаўторнай атмасферы Ружанскага замка.

     Заахвочваю ўсіх святароў, кансэкраваных асоб, свецкіх вернікаў і ўсіх людзей добрай волі да актыўнага ўдзелу ў гэтай знакавай урачыстасці 28 верасня ў Ружанах. Няхай нашая супольная малітва ў дзень распачацця юбілейнага года Пінскай дыяцэзіі прынясе шчодры і трывалы духоўны плён.        

     З пастырскім благаслаўленнем,

✠ Антоні Дзям’янка

        Біскуп Пінскі

Пінск, 16 верасня 2024 г.

7 верасня ў катэдральнай базыліцы Унебаўзяцця Найсвяцейшай Панны Марыі ў Пінску адбылося біскупскае пасвячэнне ксяндза каноніка Андрэя Зноскі, якога Папа Францішак прызначыў дапаможным біскупам Пінскай дыяцэзіі.

Галоўным пасвячаючым біскупам стаў Апостальскі нунцый арцыбіскуп Антэ Ёзіч, які завяршае сваё служэнне ў Беларусі і цяпер будзе прадстаўніком Святога Айца ў Грузіі і Арменіі. Яму асіставалі біскуп Пінскі Антоні Дзям’янка і Мітрапаліт Мінска-Магілёўскі арцыбіскуп Юзаф Станеўскі, а таксама біскуп Гродзенскі Аляксандр Кашкевіч, біскуп Віцебскі Алег Буткевіч, каад’ютар Гродзенскай дыяцэзіі біскуп Уладзімір Гуляй,Генеральны вікарый Мінска-Магілёўскай архідыяцэзіі біскуп Юрый Касабуцкі, біскуп Казімір Велікаселец з Гомеля.

Свае віншаванні новапасвячанаму біскупу Зноску даслаў таксама арцыбіскуп эмэрыт Тадэвуш Кандрусевіч, які цяпер знаходзіцца ў Казахстане, дзе бярэ ўдзел у святкаванні юбілею 25-годдзя з часу заснавання Карагандзінскай дыяцэзіі.

На пачатку ўрачыстай святой Імшы, падчас якой адбываліся абрады пасвячэння, была абвешчана намінацыйная була — дакумент Папы Францішка, якім ён прызначыў ксяндза Андрэя Зноску дапаможным біскупам Пінскай дыяцэзіі і тытулярным біскупам Скардоны.

Пераклад папскай булы на беларускую мову прачытаў адзін з асістуючых святароў ксёндз канонік Антоній Казлоўскі, дэкан Смаргонскі.

Святы Айцец, звяртаючыся ў гэтым сваім лісце да Андрэя Зноскі, між іншым, напісаў:

«Пан, які ў сваёй любові паказаў блукаючым святло праўды, каб усе, хто вызнаюць сябе хрысціянамі, маглі вярнуцца на шлях міру і шчыра імкнуліся да таго, што яму спрыяе, паслаў у гэты свет наступнікаў апосталаў, каб яны як мага старанней выконвалі абавязак абвяшчэння Евангелля.

З увагі на тое, што вялебны брат Антоні Дзям’янка, біскуп Пінскай дыяцэзіі лацінскага абраду, прасіў, каб яму быў дадзены дапаможны біскуп, які падтрымаў бы яго сваёй дапамогаю і руплівасцю, і маючы ў сэрцы трывалае дабро Касцёла ў Беларусі, Мы ахвотна схіляемся да ягонай просьбы. Таму Мы мяркуем, умілаваны Сыне, чые чалавечыя і святарскія здольнасці жывяць нашую надзею, што ў гэтай важнай справе ты належна і верна, а менавіта ў згодзе з Біскупам дыяцэзіі, зможаш несці сваё служэнне.

Таму, параіўшыся з Дыкастэрыяй па справах Біскупаў і беручы пад увагу меркаванне Дзяржаўнага Сакратарыяту, Мы ўстанаўліваем цябе Дапаможным біскупам Пінскай дыяцэзіі лацінскага абраду і адначасова мянуем тытулярным біскупам Скардонскім, надаючы ўсе неабходныя правы і ўскладаючы на цябе адпаведныя абавязкі. Што датычыцца твайго біскупскага пасвячэння, то яго ты зможаш прыняць ад каталіцкага біскупа, якога выбярэш, у любым месцы па-за Рымам, з захаваннем літургічных нормаў. Але спярша неабходна, каб ты даў вызнанне веры, а таксама прысягу вернасці Нам і Нашым Наступнікам на гэтым Пасадзе. Нарэшце, умілаваны Сыне, даручаем цябе і тваё служэнне заступніцтву Найсвяцейшай Панны Марыі і Яе Абранніка святога Юзафа, а таксама заклікаем і просім, каб ты навучаў Хрыстовых вернікаў усім сэрцам любіць усемагутнага Бога, імя Якога — любоў (пар. 1 Ян 4, 8), якую Ён нам ясна выявіў ва ўцелаўленні Хрыста, каб у праўдзе Святога Духа, які сапраўды перамяняе аблічча зямлі і свету, падтрыманы ўсімі неабходнымі ласкамі ты прыносіў гэтую любоў у штодзённае жыццё».

Була была падпісана Папам Францішкам 19 ліпеня 2024 года.

Біскуп намінат Андрэй Зноска, 19 ліпеня прызначаны Папам Францішкам дапаможным біскупам Пінскай дыяцэзіі, запрашае ў Пінск на біскупскае пасвячэнне, якое адбудзецца 7 верасня.

Дарагія сёстры і браты ў Хрысце, людзі добрай волі!

Вялебныя браты ў святарстве, шаноўныя манаскія асобы!

Як вядома, 19 ліпеня Яго Святасць Папа Францішак ласкава прызначыў мяне на пасаду дапаможнага біскупа Пінскай дыяцэзіі.

Дзякуючы Богу за дар паклікання да паўнаты святарства і ў адзінстве з найдастойнейшым біскупам Антоніем Дзям’янкам, біскупам Пінскім, прагну запрасіць кожную і кожнага з вас прыняць удзел ва ўрачыстай Эўхарыстыі, цэлебрацыю якую узначаліць Апостальскі нунцый арцыбіскуп Антэ Ёзіч, і падчас якой я прыму біскупскае пасвячэнне.

Урачыстасць адбудзецца ў катэдральнай базыліцы Унебаўзяцця Найсвяцейшай Панны Марыі ў Пінску ў суботу 7 верасня а 16-й гадзіне.

У падрыхтоўцы да прыняцця паўнаты святарства даручаю сябе малітвам Божай Маці, праслаўленай у Лагішынскім абразе, і святога мучаніка Андрэя Баболі, Апостала Палесся. Прашу таксама Божы люд, кожнага з вас, сёстры і браты, аб малітве за мяне, каб даручанае мне служэнне выконваў у духу вернасці Богу, Апостальскай Сталіцы і Касцёлу.

Да сустрэчы ў Пінску!

✠ Андрэй Зноска

з ласкі Бога і Апостальскай Сталіцы
тытулярны біскуп Скардоны
дапаможны біскуп Пінскай дыяцэзіі

21 верасня Катэхетычны каледж імя Зыгмунта Лазінскага ў Баранавічах будзе адзначаць 15-годдзе сваёй плённай дзейнасці. Дзень 3 кастрычніка 2009 года стаў адметнай датай у найноўшай гісторыі Каталіцкага Касцёла на Беларусі. У гэты дзень у Баранавічах афіцыйна распачала сваю дзейнасць першая каталіцкая тэалагічная ўстанова для свецкіх. І хоць ініцыятыва па яе стварэнню сягае пачаткаў 1990-х, то менавіта дзякуючы намаганням кардынала Казіміра Свёнтка, манаскай супольнасці Божага Слова і святароў Пінскай дыяцэзіі – ксяндза Андрэя Рылкі і ксяндза Алега Сількевіча – Катэхетычны каледж не толькі распачаў сваю духоўна-адукацыйную дзейнасць, але і праклаў шлях для паспяховага існавання ў наш час падобных установаў у Мінску і Гродне.

Сёння Катэхетычны каледж у Баранавічах – гэта ўнікальная тэалагічная ўстанова для свецкіх асобаў, дзе кожны жадаючы можа бясплатна на працягу трох гадоў навучання атрымаць грунтоўную тэалагічную адукацыю, а таксама паглыбіць свае веды ў галіне філасофіі, псіхалогіі і рэлігіязнаўства.

На сённяшні дзень у Катэхетычным каледжы ў Баранавічах можна атрымаць адукацыю па наступных спкецыялізацыях:

1. “Катэхетыка” – прадугледжана для асобаў, якія жадаюць пасля заканчэння ўстановы працаваць у парафіях у якасці катэхета (выкладчыка катэхізіса).

Дадаткова на гэтай спецыялізацыі можна атрымаць наступныя кваліфікацыі:

• арганізатар літургіі,
• арганізатар рэлігійнага турызму і адпачынку,
• супрацоўнік каталіцкіх СМІ.

• “Агульная тэалогія” – прадугледжана для асобаў, якія жадаюць паглыбіць сваю веру і веды, вывучаючы каталіцкую тэалогію.

• “Сямейнае кансультаванне” – прадугледжана для асобаў, якія жадаюць на прафесійным узроўні дапамагаць душпастырам у вырашэнні разнастайных духоўных і маральных пытанняў, звязаных з сужэнскім і сямейным жыццём вернікаў.

• “Кансультаванне ў галіне залежнасцяў”  – прадугледжана для асобаў, якія жадаюць на прафесійным узроўні дапамагаць душпастырам у вырашэнні разнастайных духоўных і маральных праблем, звязаных з разнастайнымі залежнасцямі і сузалежнасцямі.

Пры гэтай тэалагічнай установе дзейнічае ўнікальны для Беларусі “Музей Бібліі”, дзе кожны жадаючы можа наглядна і падрабязна пазнаёміцца з гісторыяй паўставання, захавання і перадачы з пакалення ў пакаленне тэкстаў Святога Пісання.    

7 верасня ў Катэхетычным каледжы ў Баранавічах адбудзецца ўступны экзамен. Усе хто, жадае паглыбіць свае веды ў галіне Святога Пісання, тэалогіі, дапамогі людзям у іх духоўных і маральных клопатах, а таксама пазнаць таямніцы хрысціянскай веры, могуць падрабязна пазнаёміцца з умовамі навучання на інтэрнет-старонцы каледжа: https://catcollege.by/ або па тэлефоне сакратарыяту гэтай установы: +375 (163) 57-93-14,
+375 (29) 513 57 92 (МТС).

Дырэкцыя Катэхетычнага каледжа запрашае ўсіх студэнтаў, выкладчыкаў, выпускнікоў і сяброў гэтай установы на супольную святую Імшу падзякі за 15 год яе паспяховай дзейнасці. Святая Імша адбудзецца 21 верасня а 16.00 у капліцы каледжа (г. Баранавічы, вул. Т. Шаўчэнкі, 6).

Кс. А. Рылка   

Біскупа Пінскага Антонія Дзям’янкі з нагоды пасвячэння дапаможнага біскупа і распачацця святкавання 100-ай гадавіны заснавання Пінскай дыяцэзіі

Да вернікаў Пінскай дыяцэзіі

Умілаваныя ў Хрысце браты і сёстры, людзі добрай волі!

У ліпені бягучага года Святы Айцец Францішак прызначыў дапаможнага біскупа для нашай Пінскай дыяцэзіі. Мы ўдзячныя Яго Святасці за гэтае прызначэнне асабліва цяпер, калі Паўсюдны Касцёл рыхтуецца да Юбілею Адкуплення ў наступным годзе, а наш мясцовы Касцёл неўзабаве распачне святкаванне сотай гадавіны заснавання Пінскай дыяцэзіі.

Мы дзякуем Святому Айцу Францішку за яго служэннне і ўвагу да патрэбаў Касцёла на нашай зямлі. Дзякуючы Добраму Богу за дар Пантыфіка, узносім таксама малітву падзякі за плённую працу ў Беларусі Апостальскага Нунцыя Арцыбіскупа Антэ Ёзіча, які завяршае сваю місію ў нашай краіне. Молімся аб далейшым Божым благаслаўленні для яго на новым месцы служэння.

Запрашаю ўсіх вернікаў дыяцэзіі і ўсіх людзей добрай волі да ўдзелу ў біскупскім пасвячэнні Яго Эксцэленцыі Андрэя Зноскі, якое адбудзецца 7 верасня а 16.00 у Пінскім катэдральным касцёле. Прашу таксама ўсіх душпастыраў, каб у бліжэйшыя нядзелі 1 і 8 верасня падчас кожнай святой Імшы ў Малітве вернікаў узнеслі да Усемагутнага Бога просьбу аб неабходных дарах і ласках для новага дапаможнага біскупа нашай дыяцэзіі, каб яго служэнне прыносіла шчодрыя плёны.   

Запрашаю таксама да ўдзелу ва ўрачыстым распачацці святкавання юбілею 100-годдзя Пінскай дыяцэзіі, якое адбудзецца 28 верасня ў Ружанах. Урачыстасць распачаннецца а 11.00 гадзіне са святой Імшы з пасвячэннем адноўленай гістарычнай капліцы святога Казіміра ў гэтым мястэчку і працягнецца ў мясцовым парафіяльным касцёле Найсвяцейшай Тройцы. Падрабязная праграма ўрачыстасці будзе апубулікавана ў бліжэйшы час на інтэрнет-старонках: pcd.by, catholic.by, а таксама на дошцы аб’яваў каля кожнага касцёла і капліцы ў нашай дыяцэзіі.       

З пастырскім благаслаўленнем,

+ Антоні Дзям’янка

      Біскуп Пінскі

Пінск, 26 жніўня 2024 г.