Велікоднае віншаванне Біскупа Антонія Дзям’янка

“Благаслаўлёны Бог і Айцец нашага Пана Езуса Хрыста,

які праз вялікую сваю міласэрнасць адрадзіў нас

да жывой надзеі праз Уваскрасенне Езуса Хрыста”

(1 Пётр, 1, 3)

Дарагія ў Хрысце браты і сёстры!

Хрыстус Уваскрос! Сапраўды Уваскрос! Аллелюя!

Гэтае хрысціянскае пасхальнае прывітанне выражае вялікую радасць і надзею кожнага веруючага чалавека. Яго ўвасабленнем з’яўляецца паўсталы з мёртвых Сын Божы – Збавіцель свету. 

З нагоды святкавання Хрыстовага Уваскрасення складаю сардэчныя пажаданні радасці жыцця, нязломнай надзеі і бясконцай моцы ў рэалізацыі заданняў, якія ставіць перад намі Божы Провід. Зычу няспыннага досведу прысутнасці Змёртвыхпаўсталага Хрыста ў кожнай справе і кожным спатканні.

Вялікдзень адкрывае перад намі таямніцу Божай Міласэрнасці. Яна дазваляе спазнаваць паўнату ласкі, якая — па словах Папы Францішка — “можа перамяніць сэрца чалавека і ўчыніць яго здольным да вялікіх справаў”.

Таямніца Пасхі нагадвае нам аб перамозе святла, дабра і жыцця. Жадаю кожнаму з Вас моцнага здароўя душы і цела, пасхальнага аптымізму ў кожнай справе і ў кожным спатканні. Няхай святкаванне Вялікадня дапаможа набрацца новых сілаў да пераадолення ўсялякіх цяжкасцяў і напоўніць нязломным даверам да Божай Моцы і Мудрасці, дзякуючы якой можам адважна глядзець у будучыню.

З велікоднымі віншаваннямі і пасхальным благаслаўленнем,

+ Антоні Дзям’янка

      Біскуп Пінскі

Пінск, Вялікдзень, 2021 г.

Новыя прызначэнні ў Пінскай дыяцэзіі

Паводле рашэння Біскупа Пінскага Антонія Дзям’янка, з 30 сакавіка 2021 г. у Пінскай дыяцэзіі адбыліся наступныя змены ў пастырскім служэнні некаторых святароў:

  1. Ксёндз Антоні Анціпенка прызначаны віцэ-дэканам Брэсцкага дэканату.
  2. Ксёндз Павел Мазан прызначаны намеснікам дырэктара дабрачыннай місіі “Карытас” Пінскай дыяцэзіі, а таксама натарыусам Курыі Пінскай дыяцэзіі.
  3. Ксёндз Ян Саламон звольнены з пасады дэкана Ляхавіцкага дэканату.
  4. Ксёндз Вінцэнт Сяўрук прызначаны новым дэканам Ляхавіцкага дэканату.
  5. Ксёндз Тадэвуш Саморэк звольнены з пасады дэкана Гомельскага дэканату.
  6. Айцец Леанард Адушкевіч OSPPE прызначаны новым дэканам Гомельскага дэканату.  

Юбілейныя касцёлы і адпусты на Год св. Юзафа абвешчаныя ў Пінскай дыяцэзіі

Featured

Біскуп Пінскі Антоні Дзям’янка падпісаў дэкрэт аб устанаўленні юбілейных святынь і ўмоваў атрымання поўнага адпусту на абвешчаны Папам Францішкам  Год Святога Юзафа.

На тэрыторыі Пінскай дыяцэзіі ў перыяд з 19 сакавіка па 8 снежня 2021 года поўны адпуст могуць атрымаць вернікі, якія ў Год святога Юзафа будуць выконваць наступныя пабожныя практыкі:

  • на працягу 30 хвілін паразважаюць над малітвай “Ойча наш”, або прымуць удзел у прынамсі аднадзённых духоўных рэкалекцыях, якія прадугледжваюць разважанне над асобай св. Юзафа;
  • па прыкладу св. Юзафа споўняць учынкі міласэрнасці адносна цела і душы бліжняга;
  • будуць маліцца св. Ружанцам у сем’ях і між заручанымі;
  • будуць штодзённа давяраць сваю дзейнасць абароне св. Юзафа, а таксама кожны вернік, які ўзнясе малітвы праз заступніцтва Рамесніка з Назарэту, каб тыя, хто шукае працу, маглі знайсці яе, і каб праца ўсіх была больш годнай;
  • памоляцца Літаніяй да св. Юзафа, або любой малітвай да св. Юзафа ў інтэнцыі Касцёла, які пераследуецца ad intra і ad extra, і аб суцяшэнні для ўсіх хрысціянаў, якія пакутуюць ад розных форм пераследу;
  • памоляцца да св. Юзафа ці здзейсняць акт пабожнасці ў яго гонар 19 сакавіка і 1 мая, у свята Святой Сям’і Езуса, Марыі і Юзафа, а таксама ў 19-ы дзень кожнага месяца і кожную сераду, якая прысвечана гэтаму святому.

У кантэксце надзвычайнай эпідэміялагічнай сітуацыі дар поўнага адпусту асаблівым чынам распаўсюджваецца на пажылых людзей, на хворых і паміраючых, на ўсіх, хто па законных прычынах не мае магчымасці выходзіць з дому. Для атрымання адпусту ім патрэбна адсутнасць прывязанасці да граху, намер паспавядацца, як толькі гэта стане магчымым, выканаць тры звычайныя ўмовы, а таксама ўчыніць акт пабожнасці ў гонар св. Юзафа, суцяшыцеля хворых і апекуна добрай смерці, з даверам ахвяруючы Богу пакуты і нязручнасці свайго жыцця.

Каб Юбілейны год стаў бачным знакам ласкі, біскуп заахвочвае душпастыраў, асабліва тых, якія служаць ва ўстаноўленых юбілейных касцёлах, 19 дня кожнага месяца, і ў кожную сераду, у касцёлах і капліцах праводзіць адмысловае набажэнства ў гонар св. Юзафа і маліцца разам з вернікамі малітвай да св. Юзафа, праўна зацверджанай, у інтэнцыі хворых, паміраючых, пераследаваных і людзей працы. Акарамя таго, іерарх заахвочвае ў парафіях, дзе гэта магчыма, падчас Юбілейнага Года св. Юзафа ўвесці перад Святой Імшой, у якой удзельнічае найбольшая колькасць вернікаў, рэгулярную гадзінную Адарацыю Найсвяцейшага Сакрамэнту ў інтэнцыі Касцёла на Беларусі і аб Божым благаслаўленні для нашага народа.

Юбілейнымі касцёламі, дзе можна атрымаць поўны адпуст падчас пілігрымавання ў Год св. Юзафа, прымаючы ўдзел у Святой Імшы альбо іншым набажэнстве, ці молячыся прыватна, беручы пад увагу малітвы прадпісаныя Святым Пасадам, устанаўліваюцца наступныя святыні:

  1. Катэдральная базыліка Унебаўзяцця Найсвяцейшай Панны Марыі ў Пінску.
  2. Санктуарый Маці Божай Каралевы Палесся ў Лагішыне.
  3. Санктуарый Маці Божай Фацімскай у Баранавічах.
  4. Санктуарый св. Андрэя Баболі ў Іванаве Палескім.
  5. Касцёл Нараджэння Найсвяцейшай Панны Марыі ў Гомелі.
  6. Касцёл св. Юзафа ў Брэсце.
  7. Касцёл св. Юзафа ў Жабінцы.
  8. Касцёл св. Юзафа ў Жыткавічах.
  9. Касцёл св. Юзафа ў Лунінцы.
  10. Касцёл св. Юзафа ў Ляхавічах.

Зварот біскупа Пінскага Антонія Дзям’янкі на Вялікі пост

«Навяртайцеся і верце ў Евангелле» (Мк 1, 15)

Умілаваныя ў Хрысце браты і сёстры!

Мы распачынаем Вялікі пост у 2021 годзе. У нашым жыцці гэта чарговы час, калі мы можам наблізіцца да Хрыста, заглыбляючыся ў тое, што найважнейшае для нашага збаўлення — у таямніцу Мукі, смерці і Уваскрасення Езуса.

Пра што нельга забывацца, распачынаючы Вялікі пост?

Пра тое, што заўсёды прыходзіць на думку, калі мы перажываем гэты літургічны перыяд: Крыжовы шлях, велікапосныя рэкалекцыі, перажыванне кожнай пятніцы як дня ўспаміну Мукі і смерці нашага Адкупіцеля. Гэта вядомыя нам пабожныя практыкі. Але сёлета мы іх перажываем у асаблівым кантэксце. Гэта складаны час для нас і для ўсяго свету. Гэты час паказвае нам нашую людскую абмежаванасць, бездапаможнасць, чалавечае цярпенне, нарэшце — смерць.

Разам з тым гэта час, які дае нам магчымасць лепш зразумець словы святой Тэрэзы ад Езуса: «Не турбуйся, не бойся — Бога дастаткова» (пар. таксама 2 Кар 12, 9). Дастаткова Езуса Хрыста. Перажыванні нашага часу дапаўняюць гэтае пасланне: Ён Бог, які спазнаў, што значыць быць слабым чалавекам. Ён так палюбіў свет, так любіць кожнага чалавека, што прайшоў праз брамы цярпення і смерці. Ён прайшоў усё гэта, каб перамагчы смерць. Усё дзеля таго, каб апошняе слова належала жыццю. Дзеля таго, каб мы жылі (пар. Флп 2, 6–11). Бога сапраўды дастаткова.

Кожны раз, калі Езус здзяйсняў цуд, Ён паказваў, кім ёсць. Ён загадваў вучням і сведкам захаваць маўчанне пра ўсё ажно да завяршэння Ягонай місіі на зямлі.

Такім чынам Ён паказаў на вельмі важны элемент гэтай місіі — суцішэнне.

Не дзіўна, што да непасрэднага выканнання сваёй місіі Хрыстус рыхтаваўся, посцячы ў цішыні пустыні на працягу сарака дзён. Так Ён паказвае нам і на Вялікі пост як на асаблівы час суцішэння не толькі ў літургічным годзе, але і ва ўсім нашым хрысціянскім жыцці.

Цяпер мы ў чарговы раз уваходзім у гэты час. Што мы можам зрабіць, каб ён унёс нешта асаблівае і новае ў гэты год, а тым самым дапамог з кожным наступным годам адкрываць усцяж новыя духоўныя перспектывы? Падчас Вялікага посту неабходна паглыбіцца ў Бога. Выпусціць з рук усё, што, як нам здаецца, трымае нас пры жыцці і напаўняе яго нейкім сэнсам. Насамрэч яно часта засланяе ад нас Бога. Таму кіраванне нашым жыццём неабходна перадаць Хрысту.

Езуса дастаткова. Няхай гэтая думка дапаможа нам увайсці ў святы час посту і няхай яму спадарожнічае.

Няхай гэты час дапаможа нам глыбей адкрыць тое, што коратка выразіў святы Ян Апостал, кажучы пра Бога, аб’яўленага ў Хрысце Збавіцелю: «Бог ёсць любоў» (1 Ян 4, 16).

На час Вялікага Посту з сэрца благаслаўляю.

+ Антоні Дзям’янка
біскуп Пінскі

Пінск, 15 лютага 2021 г.

Адышоў у вечнасць ксёндз Юзаф Войда SChr, будаўнік касцёла ў Ганцавічах

Курыя Пінскай дыяцэзіі і супольнасць Таварыства Хрыста ў Беларусі са смуткам паведамляюць, што 6 лютага ў Польшчы на 92-м годзе жыцця адышоў у вечнасць ксёндз Юзаф Войда, хрыстусовец.

З 1993 па 2007 гады святар быў першым у пасляваенны час пробашчам каталіцкай парафіі Адведзінаў Найсвяцейшай Панны Марыі ў Ганцавічах, дзе яго намаганнямі быў пабудаваны касцёл. Акрамя таго, ксёндз Юзаф за сваё доўга святарскае жыццё ў харызме Таварыства Хрыста нёс служэнне ў сябе на радзіме ў Польшчы, а таксама ў розных краінах, сярод якіх ЗША, Аўстралія, Кот-д’Івуар, Марока, Ірак, Венгрыя, Казахстан і Украіна.

Абрады развітання з ксяндзом Юзафам Войдам SChr распачнуцца 8 лютага, а пахаванне спачылага святара адбудзецца 9 лютага ў Лапушне (Польшча).

У Мазыры аднаўляецца адзін з найстарэйшых касцёлаў

3 лютага ў касцёле Узвышэння Святога Крыжа ў Мазыры ўпершыню за паўтара стагоддзя адбылася святая Імша з удзелам духавенства і вернікаў. Набажэнства было прымеркавана да 310-й гадавіны пасвячэння касцёла.

Гэтая святыня разам з яшчэ двума касцёламі — найстарэйшыя захаваныя пабудовы ў Мазыры. З былых шасці касцёлаў горада захавалася тры. Адзін з касцёлаў — Унебаўзяцця Найсвяцейшай Панны Марыі — быў адноўлены на пачатку 1990-х гадоў і з таго часу служыць парафіяльнай святыняй. Другі (пабэрнардынскі) выкарыстоўваецца як праваслаўны кафедральны сабор.

Трэці захаваны касцёл — Узвышэння Святога Крыжа — дачакаўся пачатку аднаўлення толькі ў 2019 г.

Пасля інтэнсіўных прац па ўпарадкаванні тэрыторыі і рэгістрацыі адроджанай парафіі пра гэтым касцёле ў 2020 г. стала магчымым аднаўленне таксама набажэнстваў у адаптаванай капліцы ў кляштарных прыкасцёльных памяшканнях.

Урачыстасць з нагоды першай святой Імшы непасрэдна ў касцёле ўзначаліў біскуп Пінскі Антоні Дзям’янка. Канцэлебравала Эўхарыстыю мясцовае духавенства: дэкан Мазырскі кс. Віталій Мысонаў, пробашч парафіі кс. Аляксандр Канановіч, святары з суседніх парафій. Гамілію прамовіў канцлер курыі Пінскай дыяцэзіі кс. Андрэй Рылка. Старадаўнія сцены касцёла зноў напоўніліся спевамі і малітвамі вернікаў не толькі з трох адроджаных мазырскіх парафій, але і з іншых мясцовасцяў Пінскай дыяцэзіі.

На пачатку літургіі біскуп Антоні звярнуўся да вернікаў з адмысловым уступным словам. Іерарх нагадаў сабраным велічную і драматычную гісторыю Касцёла ў Мазыры, імёны святароў, якія там служылі, і заахвоціў да малітвы за памерлых вернікаў, кансэкраваных асобаў і духавенства.

«Сёння, у 310-ю гадавіну пасвячэння касцёла Узвышэння Святога Крыжа ў Мазыры, мы сабраліся на першую ў гэтай святыні святую Імшу пасля доўгага перыяду запусцення і знеслаўлення гэтага месца, — сказаў іерарх. —

Узгадваем і агортваем удзячнай малітвай усіх тых вернікаў, якія будавалі гэты касцёл і цяпер клапоцяцца аб яго адраджэнні».

Біскуп выказаў падзяку дзяржаўным уладам, прыватным арганізацыям і ўсім неабыякавым асобам, якія «прычыніліся да вялікай справы адраджэння духоўнай спадчыны ў Анёльскай даліне Мазыра». Асаблівыя словы ўдзячнасці ён адрасаваў былому шматгадоваму пробашчу мазырскай парафіі Унебаўзяцця Найсвяцейшай Панны Марыі кс. Юзафу Дзяконскаму, а таксама ўсім душпастырам, якія «з не меншай ахвярнасцю працягваюць справу сваіх папярэднікаў».

Таксама іерарх выказаў удзячнасць Богу «за натхненне і сілы, якімі Ён надзяляе вернікаў парафіі», сярод іх асабліва падзякаваўшы Аляксандру Баранаву і кс. Віталію Мысонаву, які паходзіць з гэтай парафіі.

«Сёння, у дзень святога Блажэя, адданага душпастыра і мучаніка, молімся да міласэрнага Бога аб благаслаўленні для Касцёла ў Мазыры, аб аднаўленні гістарычных святынь і аб пабудове новых у новых мікрараёнах горада.Няхай добры Бог спрыяе нам у справе аднаўлення духоўнага жыцця, а Маці Божая Юравіцкая, Апякунка Мазыршчыны, выпрошвае ў Бога неабходныя ласкі», — дадаў пастыр Пінскай дыяцэзіі.

На заканчэнне Імшы біскуп падзякаваў усім прысутным за супольную малітву і благаславіў мазырскіх вернікаў на далейшую працу па адраджэнні іх гістарычнай святыні.

Паводле catholic.by

Вернікі Гомеля развіталіся з біскупам Казімірам Велікасельцам

10 студзеня, у свята Хросту Пана, біскуп Казімір Велікаселец узначаліў цэлебрацыю святой Імшы ў касцёле Нараджэння Маці Божай у Гомелі, якая стала для яго развітальнай у горадзе, дзе ён служыў апошнія гады.

Як нагадвае мясцовы сайт katolik.life, іерарх працяглы час быў дапаможным біскупам Пінскай дыяцэзіі, жыў у Гомелі, адраджаў тут парафію, будаваў касцёл, а цяпер павінен ехаць у Мінск, каб служыць Апостальскім адміністратарам Мінска-Магілёўскай архідыяцэзіі. На гэтую пасаду ён быў прызначаны 3 студзеня Папам Францішкам.

У сваёй развітальнай прамове біскуп Казімір адзначыў, што святары — як жаўнеры:

«Як нас вучылі ў войску, загады не абмяркоўваюць, а выконваюць…

Я не чакаў, што з майго ўжо роднага Гомеля давядзецца пераходзіць на іншую службу, больш адказную.Спадзяюся, вы будзеце памятаць мяне ў малітвах, умацоўваць мяне. А далей будзе відаць, як пойдзе гэтая служба», — цытуе біскупа Велікасельца katolik.life.

Іерарх падзякаваў вернікам Гомеля за тое, што прыходзяць у святыню, моляцца, адраджаюць парафію, бо «наша радасць — гэта жыць з Панам Богам».

Таксама гомельскія католікі развіталіся з сястрой Малгажатай, былой настаяцельніцай мясцовай супольнасці Місіянерак міласэрнасці — «сясцёр Маці Тэрэзы»: цяпер яна будзе служыць у Маскве. Вернікі падзякавалі біскупу і сястры за плённае служэнне ў Гомелі, пажадалі Божага благаслаўлення на далейшую службу і паднеслі памятныя падарункі.

Паводле catholic.by

Віншаванне Біскупа Пінскага на Божае Нараджэнне 2020

Вось Дзева зачне i народзіць Сына, i дадуць Яму iмя Эммануэль, што азначае – з намi Бог» (Мц 1, 23)

Дарагія браты і сёстры ў Хрысце!
З нагоды святаў Божага Нараджэння і Новага Году жадаю, каб гэты незвычайны для ўсіх нас час мы перажывалі як дар Божага Провіду ў будаванні лепшай будчыні. Няхай асаблівасць перажывання сёлетніх святаў і тыя жыццёвыя выклікі, якія стаяць перад намі, дапамогуць кожнаму з нас адкрыць для сябе нешта новае і добрае. Нараджэнне Хрыста напоўніла свет зусім іншым глыбінным сэнсам. Няхай таксама і нам перажыванне таямніцы калядных святаў дапаможа адкрыць новыя перспектывы ў адносінах з Богам і бліжнім.
Няхай Бог, які стаўся Чалавекам, учыніць усіх людзей яшчэ больш чалавечнымі, каб усе памяталі, што створаныя па Яго вобразу і падабенству. Каб усе мы няспынна ўзрасталі ў веры, не гублялі надзею, а перадусім любілі Бога і ўзлюбленае Ім стварэнне. Няхай Сын Божы прынясе давер туды, дзе пануе сумненне, а роспач і абыякавасць пераменіць у шчырую любоў і радасць жыцця.

Радасных Святаў Божага Нараджэння!
Хрыстус Нарадзіўся! Славім Яго!

+ Антоні Дзям’янка
Біскуп Пінскі
Божае Нараджэнне, 2020
Пінск

Зварот Біскупа Пінскага Антонія Дзям’янка на Адвэнт 2020 г.

Да вернікаў Пінскай дыяцэзіі

“Чувайце і маліцеся ўвесь час” (Лк 21,36)

Дарагія ў Хрысце браты і сёстры!

Перад намі Адвэнт 2020 года. Гэта няпросты час, які хутчэй за ўсё на доўга застанецца ў нашай памяці. Гэта зусім іншы час, які моцна адрозніваецца ад падобнага перыяду ў мінулым годзе. У пэўным сэнсе, можам назваць яго часам выпрабаванняў. Некаторыя людзі губляюць надзею, некаторыя не знаходзяць у сабе сілы любіць, іншыя становяцца абыякавымі, поўнымі страхаў. Яшчэ іншыя лічаць, што ім дастаткова жыць для сябе, а хтосьці думае, каб проста неяк усё перажыць. На фоне ўсіх тых цяжкасцяў, якія нас напаткалі, папулярнай становіцца тэма крызісу. Кажуць пра крызіс веры, крызіс любові, крызісы ў самых розных сферах жыцця.

У гэты складаны час мы ўваходзім у Адвэнт. Ён мае сваё пасланне і свой адмысловы заклік надзеі. Нязменны на працягу шматлікіх стагоддзяў. Гэта пасланне пра Збавіцеля і пра Збаўленне. На працягу гісторыі яно напэўна гучала вельмі па рознаму ў розныя эпохі: у часы войнаў, катаклізмаў, эпідэмій, патрасенняў у глабальных  маштабах і ў індывідуальных вымярэннях чалавечых жыццёвых драмаў. Але Адвэнт заўсёды прыходзіў з тым самым пасланнем: “марана та, прыйдзі, Пане Езу” (Ап 22,20). І гэты заклік заўсёды быў поўны радасці і надзеі. Бо радасць вынікала з надзеі, што Той, які надыходзіць, зменіць аблічча зямлі і чалавека. Ён зменіць змучаны твар чалавека ў шчаслівую ўсмешку, а слёзы напоўніць глыбінным і бясцэнным сэнсам. Ён пакажа, якая вялікая вартасць цярпення (Ап 21,4).

Гэтае пасланне Адвэнту не губляе актуальнасці таксама сёння. Яно нязменнае, бо нязменны Той, які надыходзіць – Езус Хрыстус, Адзіны Збаўца свету ўчора, сёння, навекі (Габр 13,8). Калі дынамізм нашага штодзённага жыцця і веры будзе выпоылываць з захаплення Хрыстом, калі нашыя словы будуць пацвярджаць нашаыя ўчынкі загартаваныя вопытам дзейснай любові да бліжняга, тады кожны, хто нас сустрэне, адчуе моц Духа, які перамяняе кожную цемру ў нязгаснае Божае святло. Як жа тужыць па такому святлу збаўлення сэрца кожнага чалавека!

             Для многіх людзей Адвэнт – гэта час падрыхтоўкі, але, нажаль, толькі знешняй. Гэта пагроза перавагі формы над зместам, прыгожай традыцыі, але не напоўненай зместам жывой веры. І многія людзі адчуваюць гэтую пустату, калі ў Адвэнце не шукаюць Езуса. Гэта яшчэ адзін важны заклік адвэнтавага перыяду: туга па сапраўднасці, пошук і адшуканне Бога, вяртанне сэнсу жыцця.

Таму звяртаюся да кожнага з вас, дарагія браты і сёстры: аднясіцеся да сёлетняга Адвэнту як да асаблівага часу Божай ласкі, асаблівага дару Божага Провіду. Не будзем жа марнаваць ні аднаго адвэнтавага дня. З радасцю будзем перажываць час чакання разам з Марыяй падчас кожнай Раратняй святой Імшы. Бо Езус надыходзіць. Ён блізка. Адчынім Яму дзверы нашага жыцця.

На дні адвэнтавага чування з сэрца благаслаўляю.

+ Антоні Дзям’янка

      Біскуп Пінскі

Пінск, 27 лістапада 2020 г.

Памёр а. Яфрэм Бісага, былы душпастыр Гомельшчыны

Featured

Курыя Пінскай дыяцэзіі са смуткам паведамляе, што на 85 годзе жыцця памёр а. Яфрэм Бісага Ocist, цыстэрс, шматгадовы душпастыр і аднавіцель Касцёла на Гомельшчыне.

Айцец Яфрэм нарадзіўся ў 1935 г. ў Польшчы, з юнацтва пачаў служэнне ў манаскім Ордэне Цыстэрсаў. Пасля святарскіх пасвячэнняў у 1974 г. шмат гадоў працаваў у Аўстрыі. На заклік Папы Яна Паўла ІІ аб душпастырскай дапамозе ў посткамуністычных краінах, у 1994 г. распачаў служэнне ў Беларусі на Гомельшчыне. Кардынала Казімір Свёнтэк даручыў яго пастырскай апецы парафіі на тэрыторыі Калінкавіцкага і Петрыкаўскага раёнаў. Дзякуючы руплівасці гэтага святара і старанням мясцовых вернікаў, удалося не толькі адрадзіць 4 парафіі ў гэтых раёнах, але і адбудаваць на нова ў кожнай з іх прыгожыя парафіяльныя святыні: у Калінкавічах, Петрыкаве, Капаткевічах і Брынёве.

У 2006 г. а. Яфрэм быў пераведзены на далейшае служэнне з Беларусі ва Украіну ў Данецкую вобласць (Арцем’еўск, Славянск). У 2019 г. вярнуўся ў Польшчу, дзе працягваў манаскае і пастырскае служэнне ў парафіі пры кляштары цыстэрцаў у г. Сулеюв да канца свайго жыцця.

Пхаванне а. Яфрэма адбудзецца 10 лістапада (аўторак) а 11.00 гадзіне ў касцёле пры абацтве цыстэрсаў у г. Ванхоцк (Wąchock) у Польшчы. Просім аб малітве за святой памяці спачылага ў Пану а. Яфрэма, які залатымі літарамі ўпісаны ў гісторыю Касцёла на Гомельшчыне. 

Вечны адпачынак дай яму, Пане. А святло вечнае няхай яму свеціць. Няхай адпачывае ў супакоі вечным.