Апостальскі Нунцый наведаў Баранавічы з нагоды юбілею горада

У нядзелю 23 мая, Апостальскі Нунцый у Беларусі Арцыбіскуп Антэ Ёзіч наведаў найстарэйшы касцёл у Баранавічах з нагоды 150-годдзя горада. Касцёл Узвышэння Святога Крыжа быў выбраны невыпадкова. У крыпце гэтай парафіяльнай святыні пахаваная графская сям’я Яна і Альжбеты Развадоўскіх, якая ў канцы 19 – пачатку 20 ст. былі ўласнікамі тутэйшай мясцовасці, паклапаціліся пра ўзнікненне і развіццё горада.

У гістарычным духоўным сэрцы горада Апостальскі Нунцый узначаліў святую Імшу, удзел у якой узяў біскуп Пінскі Аноні Дзям’янка, архімандрыт Сяргей Гаек, а таксама мясцовыя святары, кансэкраваныя асобы і вернікі. На пачатку літургіі біскуп Дзям’янка прывітаў усіх сабраных і нагадаў пра вялікую і слаўную гісторыю Касцёла ў гэтай мясцовасці.

Падчас гаміліі Апостальскі Нунцый звярнуў увагу сабраных на таямніцу дзеяння Духа Святога ў жыцці паасобных вернікаў і супольнасці Касцёла ў цэлым. Іерарх нагадаў пра неабходнасць паглыблення духоўнага жыцця і раскрыцця дароў Духа Святога, якія кожны атрымлівае падчас прыняцця святых сакрамэнтаў.

Удзельнікі святой Імшы ўзнеслі да Бога малітву падзякі за апеку Ягонага Провіду над жыхарамі горада на працягу гісторыі. Таксама памаліліся за пілотаў, якія 19 мая загінулі на ўскрайку Баранавічаў у выніку авіякатастрофы.

Пасля заканчэння літургіі, Апостальскі Нунцый у суправаджэнні святароў наведаў крыпту касцёла, дзе памаліўся за ўсіх памерлых, якія стаялі ля вытокаў горада Баранавічы.       

ОтветитьПереслать

Апостальскі нунцый Антэ Ёзіч у Пружанах асвяціў абраз Маці Божай

22 мая Апостальскі нунцый Антэ Ёзіч наведаў парафію Унебаўзяцця Найсвяцейшай Панны Марыі ў Пружанах (Пінская дыяцэзія), дзе падчас урачыстай святой Імшы здзейсніў асвячэнне абраза Маці Божай Апякункі лясоў.

Аўтарам унікальнага абраза стаў заслужаны дзеяч мастацтваў Рэспублікі Беларусь Мікалай Кузьміч, які, між іншым, зрабіў сучасную рэпліку каштоўнай рэліквіі, страчанай у гады Другой сусветнай вайны, — крыжа Еўфрасінні Полацкай.

З гэтай нагоды ў Пружаны быў дастаўлены таксама яшчэ адзін выкананы майстрам твор сакральнага мастацтва — асвячаны раней біскупам Алегам Буткевічам абраз святой Барбары. Духавенства і вернікі пранеслі яго ў працэсіі па вуліцах горада.

Перад помнікам спаленым вёскам працэсія затрымалася на Маёвае набажэнства і малітву за загінулых падчас Другой сусветнай вайны.

Праца над абразом Маці Божай Апякункі лясоў, выкананым у старадаўняй тэхніцы ў візантыйскім стылі, працягвалася сем месяцаў. Асноўнымі матэрыяламі іконы з’яўляюцца золата, срэбра, каштоўныя і паўкаштоўныя камяні. Блакітнымі літарамі падпісаны яе тытул на лаціне: Mater Dei Silvarum Patrona. На абразе — фігура Маці Божай на фоне лясоў, а таксама касцёла і шляхецкага палацыка ў Пружанах.

Гэты горад на мяжы Беларускага Палесся, размешчаны непадалёк ад славутай Белавежскай пушчы, у 1939 годзе стаў першым месцам служэння маладога святара Казіміра Свёнтка — будучага арцыбіскупа і першага ў сучаснай гісторыі Беларусі кардынала. З гэтых мясцін паходзіць і каталіцкі мецэнат, які фундаваў стварэнне каштоўнай іконы, што цяпер будзе захоўвацца ў пружанскім касцёле.

Цэлебрацыю ўрачыстай святой Імшы ўзначаліў Апостальскі нунцый арцыбіскуп Антэ Ёзіч. Пружаны сталі першай парафіяй, у якой прадстаўнік Папы Францішка ў нашай краіне цэлебраваў Імшу

У Баранавічах у касцёле памоляцца за ахвяраў авіякатастрофы

21 мая а 18.00 у касцёле святога Зыгмунта ў Баранавічах (вул. Энтузіястаў, 51) адбудзецца святая Імша, падчас якой будзе ўзнесена малітва да Божага Провіду аб захаванні жыхароў горада ад небяспекаў, а таксама аб Божай апецы і благаслаўленні для ўсіх. Удзельнікі святой літургіі памоляцца да Міласэрнага Бога за двух лётчыкаў, якія загінулі 19 мая ў выніку авіякатастрофы непадалёк ад гэтага касцёла.

Фэст у гонар святога Андрэя Баболі

У Іванаве адбыўся фэст у гонар святога Андрэя Баболі

15 мая, у вігілію ўрачыстасці святога Андрэя Баболі, галоўнага Апекуна Пінскай дыяцэзіі, вернікі са шматлікіх куткоў Палесся сабраліся ў г. Іванава (Янаў Палескі) ў санктуарыі гэтага святога мучаніка на традыцыйны фэст.

Святкаванне распачалося з Адарацыі Найсвяцейшага Сакрамэнту, падчас якой усе сабраныя ўзнеслі свае малітвы да Бога ў адмысловай літаніі праз заступніцтва святога Андрэя Баболі. Таксама была прачытана літанія да святога Юзафа, Абранніка Найсвяцейшай Панны Марыі, якому асаблівым чынам прысвяціў гэты год Папа Францішак.

Святую Імшу з нагоды ўрачыстасці ўзначаліў Біскуп Пінскі Антоні Дзям’янка. Разам з ім літургію цэлебравалі святары Пінскай дыяцэзіі, а таксама святары ўсходняга абраду на чале з айцом архімандрытам Сяргеем Гаекам.

На пачатку св. Імшы біскуп Антоні нагадаў сабраным святарам, кансэкраваным асобам і ўсім вернікам, якія прыбылі з розных парафій дыяцэзіі, пра важнасць постаці св. Андрэя Баболі як нябеснага заступніка Палесся. Таксама біскуп звярнуўся са словамі віншаванняў да ксяндза Паўла Кручэка, кусташа санктуарыя і пробашча парафіі ў Іванаве. Сёлета ксёндз Павел адзначае юбілей 25-годдзя святарскага служэння. Іерарх падзякаваў гэтаму святару за яго руплівае і плённае служэнне, большую частку якога ён прысвяціў клопату пра Касцёл на Беларусі.

Гамілію прамовіў кс. Андрэй Рылка, канцлер курыі Пінскай дыяцэзіі. Ён звярнуў вагу сабраных на пачаткі культу святога Андрэя Баболі, што было звязана з цудам яго заступніцтва і ўратавання палескага краю ад эпідэміі чумы на пачатку ХІІІ ст. Таксама святар зазначыў, што і ў ХХІ ст. прыклад руплівасці святога мучаніка ў справе евангелізацыі і катэхізацыі не губляе сваёй актуальнасці.

Пасля заканчэння літургіі ўсе сабраныя мелі магчымасць у цішыні асабістай малітвы ўшанаваць рэліквіі святога мучаніка, часцінка якіх захоўваецца ў іванаўскім санктуарыі, і падзякаваць Міласэрнаму Богу за Яго ласкавасць і апеку.

Фота: Вольга Взёнтэк

Велікоднае віншаванне Біскупа Антонія Дзям’янка

“Благаслаўлёны Бог і Айцец нашага Пана Езуса Хрыста,

які праз вялікую сваю міласэрнасць адрадзіў нас

да жывой надзеі праз Уваскрасенне Езуса Хрыста”

(1 Пётр, 1, 3)

Дарагія ў Хрысце браты і сёстры!

Хрыстус Уваскрос! Сапраўды Уваскрос! Аллелюя!

Гэтае хрысціянскае пасхальнае прывітанне выражае вялікую радасць і надзею кожнага веруючага чалавека. Яго ўвасабленнем з’яўляецца паўсталы з мёртвых Сын Божы – Збавіцель свету. 

З нагоды святкавання Хрыстовага Уваскрасення складаю сардэчныя пажаданні радасці жыцця, нязломнай надзеі і бясконцай моцы ў рэалізацыі заданняў, якія ставіць перад намі Божы Провід. Зычу няспыннага досведу прысутнасці Змёртвыхпаўсталага Хрыста ў кожнай справе і кожным спатканні.

Вялікдзень адкрывае перад намі таямніцу Божай Міласэрнасці. Яна дазваляе спазнаваць паўнату ласкі, якая — па словах Папы Францішка — “можа перамяніць сэрца чалавека і ўчыніць яго здольным да вялікіх справаў”.

Таямніца Пасхі нагадвае нам аб перамозе святла, дабра і жыцця. Жадаю кожнаму з Вас моцнага здароўя душы і цела, пасхальнага аптымізму ў кожнай справе і ў кожным спатканні. Няхай святкаванне Вялікадня дапаможа набрацца новых сілаў да пераадолення ўсялякіх цяжкасцяў і напоўніць нязломным даверам да Божай Моцы і Мудрасці, дзякуючы якой можам адважна глядзець у будучыню.

З велікоднымі віншаваннямі і пасхальным благаслаўленнем,

+ Антоні Дзям’янка

      Біскуп Пінскі

Пінск, Вялікдзень, 2021 г.

Новыя прызначэнні ў Пінскай дыяцэзіі

Паводле рашэння Біскупа Пінскага Антонія Дзям’янка, з 30 сакавіка 2021 г. у Пінскай дыяцэзіі адбыліся наступныя змены ў пастырскім служэнні некаторых святароў:

  1. Ксёндз Антоні Анціпенка прызначаны віцэ-дэканам Брэсцкага дэканату.
  2. Ксёндз Павел Мазан прызначаны намеснікам дырэктара дабрачыннай місіі “Карытас” Пінскай дыяцэзіі, а таксама натарыусам Курыі Пінскай дыяцэзіі.
  3. Ксёндз Ян Саламон звольнены з пасады дэкана Ляхавіцкага дэканату.
  4. Ксёндз Вінцэнт Сяўрук прызначаны новым дэканам Ляхавіцкага дэканату.
  5. Ксёндз Тадэвуш Саморэк звольнены з пасады дэкана Гомельскага дэканату.
  6. Айцец Леанард Адушкевіч OSPPE прызначаны новым дэканам Гомельскага дэканату.  

Юбілейныя касцёлы і адпусты на Год св. Юзафа абвешчаныя ў Пінскай дыяцэзіі

Featured

Біскуп Пінскі Антоні Дзям’янка падпісаў дэкрэт аб устанаўленні юбілейных святынь і ўмоваў атрымання поўнага адпусту на абвешчаны Папам Францішкам  Год Святога Юзафа.

На тэрыторыі Пінскай дыяцэзіі ў перыяд з 19 сакавіка па 8 снежня 2021 года поўны адпуст могуць атрымаць вернікі, якія ў Год святога Юзафа будуць выконваць наступныя пабожныя практыкі:

  • на працягу 30 хвілін паразважаюць над малітвай “Ойча наш”, або прымуць удзел у прынамсі аднадзённых духоўных рэкалекцыях, якія прадугледжваюць разважанне над асобай св. Юзафа;
  • па прыкладу св. Юзафа споўняць учынкі міласэрнасці адносна цела і душы бліжняга;
  • будуць маліцца св. Ружанцам у сем’ях і між заручанымі;
  • будуць штодзённа давяраць сваю дзейнасць абароне св. Юзафа, а таксама кожны вернік, які ўзнясе малітвы праз заступніцтва Рамесніка з Назарэту, каб тыя, хто шукае працу, маглі знайсці яе, і каб праца ўсіх была больш годнай;
  • памоляцца Літаніяй да св. Юзафа, або любой малітвай да св. Юзафа ў інтэнцыі Касцёла, які пераследуецца ad intra і ad extra, і аб суцяшэнні для ўсіх хрысціянаў, якія пакутуюць ад розных форм пераследу;
  • памоляцца да св. Юзафа ці здзейсняць акт пабожнасці ў яго гонар 19 сакавіка і 1 мая, у свята Святой Сям’і Езуса, Марыі і Юзафа, а таксама ў 19-ы дзень кожнага месяца і кожную сераду, якая прысвечана гэтаму святому.

У кантэксце надзвычайнай эпідэміялагічнай сітуацыі дар поўнага адпусту асаблівым чынам распаўсюджваецца на пажылых людзей, на хворых і паміраючых, на ўсіх, хто па законных прычынах не мае магчымасці выходзіць з дому. Для атрымання адпусту ім патрэбна адсутнасць прывязанасці да граху, намер паспавядацца, як толькі гэта стане магчымым, выканаць тры звычайныя ўмовы, а таксама ўчыніць акт пабожнасці ў гонар св. Юзафа, суцяшыцеля хворых і апекуна добрай смерці, з даверам ахвяруючы Богу пакуты і нязручнасці свайго жыцця.

Каб Юбілейны год стаў бачным знакам ласкі, біскуп заахвочвае душпастыраў, асабліва тых, якія служаць ва ўстаноўленых юбілейных касцёлах, 19 дня кожнага месяца, і ў кожную сераду, у касцёлах і капліцах праводзіць адмысловае набажэнства ў гонар св. Юзафа і маліцца разам з вернікамі малітвай да св. Юзафа, праўна зацверджанай, у інтэнцыі хворых, паміраючых, пераследаваных і людзей працы. Акарамя таго, іерарх заахвочвае ў парафіях, дзе гэта магчыма, падчас Юбілейнага Года св. Юзафа ўвесці перад Святой Імшой, у якой удзельнічае найбольшая колькасць вернікаў, рэгулярную гадзінную Адарацыю Найсвяцейшага Сакрамэнту ў інтэнцыі Касцёла на Беларусі і аб Божым благаслаўленні для нашага народа.

Юбілейнымі касцёламі, дзе можна атрымаць поўны адпуст падчас пілігрымавання ў Год св. Юзафа, прымаючы ўдзел у Святой Імшы альбо іншым набажэнстве, ці молячыся прыватна, беручы пад увагу малітвы прадпісаныя Святым Пасадам, устанаўліваюцца наступныя святыні:

  1. Катэдральная базыліка Унебаўзяцця Найсвяцейшай Панны Марыі ў Пінску.
  2. Санктуарый Маці Божай Каралевы Палесся ў Лагішыне.
  3. Санктуарый Маці Божай Фацімскай у Баранавічах.
  4. Санктуарый св. Андрэя Баболі ў Іванаве Палескім.
  5. Касцёл Нараджэння Найсвяцейшай Панны Марыі ў Гомелі.
  6. Касцёл св. Юзафа ў Брэсце.
  7. Касцёл св. Юзафа ў Жабінцы.
  8. Касцёл св. Юзафа ў Жыткавічах.
  9. Касцёл св. Юзафа ў Лунінцы.
  10. Касцёл св. Юзафа ў Ляхавічах.

Зварот біскупа Пінскага Антонія Дзям’янкі на Вялікі пост

«Навяртайцеся і верце ў Евангелле» (Мк 1, 15)

Умілаваныя ў Хрысце браты і сёстры!

Мы распачынаем Вялікі пост у 2021 годзе. У нашым жыцці гэта чарговы час, калі мы можам наблізіцца да Хрыста, заглыбляючыся ў тое, што найважнейшае для нашага збаўлення — у таямніцу Мукі, смерці і Уваскрасення Езуса.

Пра што нельга забывацца, распачынаючы Вялікі пост?

Пра тое, што заўсёды прыходзіць на думку, калі мы перажываем гэты літургічны перыяд: Крыжовы шлях, велікапосныя рэкалекцыі, перажыванне кожнай пятніцы як дня ўспаміну Мукі і смерці нашага Адкупіцеля. Гэта вядомыя нам пабожныя практыкі. Але сёлета мы іх перажываем у асаблівым кантэксце. Гэта складаны час для нас і для ўсяго свету. Гэты час паказвае нам нашую людскую абмежаванасць, бездапаможнасць, чалавечае цярпенне, нарэшце — смерць.

Разам з тым гэта час, які дае нам магчымасць лепш зразумець словы святой Тэрэзы ад Езуса: «Не турбуйся, не бойся — Бога дастаткова» (пар. таксама 2 Кар 12, 9). Дастаткова Езуса Хрыста. Перажыванні нашага часу дапаўняюць гэтае пасланне: Ён Бог, які спазнаў, што значыць быць слабым чалавекам. Ён так палюбіў свет, так любіць кожнага чалавека, што прайшоў праз брамы цярпення і смерці. Ён прайшоў усё гэта, каб перамагчы смерць. Усё дзеля таго, каб апошняе слова належала жыццю. Дзеля таго, каб мы жылі (пар. Флп 2, 6–11). Бога сапраўды дастаткова.

Кожны раз, калі Езус здзяйсняў цуд, Ён паказваў, кім ёсць. Ён загадваў вучням і сведкам захаваць маўчанне пра ўсё ажно да завяршэння Ягонай місіі на зямлі.

Такім чынам Ён паказаў на вельмі важны элемент гэтай місіі — суцішэнне.

Не дзіўна, што да непасрэднага выканнання сваёй місіі Хрыстус рыхтаваўся, посцячы ў цішыні пустыні на працягу сарака дзён. Так Ён паказвае нам і на Вялікі пост як на асаблівы час суцішэння не толькі ў літургічным годзе, але і ва ўсім нашым хрысціянскім жыцці.

Цяпер мы ў чарговы раз уваходзім у гэты час. Што мы можам зрабіць, каб ён унёс нешта асаблівае і новае ў гэты год, а тым самым дапамог з кожным наступным годам адкрываць усцяж новыя духоўныя перспектывы? Падчас Вялікага посту неабходна паглыбіцца ў Бога. Выпусціць з рук усё, што, як нам здаецца, трымае нас пры жыцці і напаўняе яго нейкім сэнсам. Насамрэч яно часта засланяе ад нас Бога. Таму кіраванне нашым жыццём неабходна перадаць Хрысту.

Езуса дастаткова. Няхай гэтая думка дапаможа нам увайсці ў святы час посту і няхай яму спадарожнічае.

Няхай гэты час дапаможа нам глыбей адкрыць тое, што коратка выразіў святы Ян Апостал, кажучы пра Бога, аб’яўленага ў Хрысце Збавіцелю: «Бог ёсць любоў» (1 Ян 4, 16).

На час Вялікага Посту з сэрца благаслаўляю.

+ Антоні Дзям’янка
біскуп Пінскі

Пінск, 15 лютага 2021 г.

Адышоў у вечнасць ксёндз Юзаф Войда SChr, будаўнік касцёла ў Ганцавічах

Курыя Пінскай дыяцэзіі і супольнасць Таварыства Хрыста ў Беларусі са смуткам паведамляюць, што 6 лютага ў Польшчы на 92-м годзе жыцця адышоў у вечнасць ксёндз Юзаф Войда, хрыстусовец.

З 1993 па 2007 гады святар быў першым у пасляваенны час пробашчам каталіцкай парафіі Адведзінаў Найсвяцейшай Панны Марыі ў Ганцавічах, дзе яго намаганнямі быў пабудаваны касцёл. Акрамя таго, ксёндз Юзаф за сваё доўга святарскае жыццё ў харызме Таварыства Хрыста нёс служэнне ў сябе на радзіме ў Польшчы, а таксама ў розных краінах, сярод якіх ЗША, Аўстралія, Кот-д’Івуар, Марока, Ірак, Венгрыя, Казахстан і Украіна.

Абрады развітання з ксяндзом Юзафам Войдам SChr распачнуцца 8 лютага, а пахаванне спачылага святара адбудзецца 9 лютага ў Лапушне (Польшча).

У Мазыры аднаўляецца адзін з найстарэйшых касцёлаў

3 лютага ў касцёле Узвышэння Святога Крыжа ў Мазыры ўпершыню за паўтара стагоддзя адбылася святая Імша з удзелам духавенства і вернікаў. Набажэнства было прымеркавана да 310-й гадавіны пасвячэння касцёла.

Гэтая святыня разам з яшчэ двума касцёламі — найстарэйшыя захаваныя пабудовы ў Мазыры. З былых шасці касцёлаў горада захавалася тры. Адзін з касцёлаў — Унебаўзяцця Найсвяцейшай Панны Марыі — быў адноўлены на пачатку 1990-х гадоў і з таго часу служыць парафіяльнай святыняй. Другі (пабэрнардынскі) выкарыстоўваецца як праваслаўны кафедральны сабор.

Трэці захаваны касцёл — Узвышэння Святога Крыжа — дачакаўся пачатку аднаўлення толькі ў 2019 г.

Пасля інтэнсіўных прац па ўпарадкаванні тэрыторыі і рэгістрацыі адроджанай парафіі пра гэтым касцёле ў 2020 г. стала магчымым аднаўленне таксама набажэнстваў у адаптаванай капліцы ў кляштарных прыкасцёльных памяшканнях.

Урачыстасць з нагоды першай святой Імшы непасрэдна ў касцёле ўзначаліў біскуп Пінскі Антоні Дзям’янка. Канцэлебравала Эўхарыстыю мясцовае духавенства: дэкан Мазырскі кс. Віталій Мысонаў, пробашч парафіі кс. Аляксандр Канановіч, святары з суседніх парафій. Гамілію прамовіў канцлер курыі Пінскай дыяцэзіі кс. Андрэй Рылка. Старадаўнія сцены касцёла зноў напоўніліся спевамі і малітвамі вернікаў не толькі з трох адроджаных мазырскіх парафій, але і з іншых мясцовасцяў Пінскай дыяцэзіі.

На пачатку літургіі біскуп Антоні звярнуўся да вернікаў з адмысловым уступным словам. Іерарх нагадаў сабраным велічную і драматычную гісторыю Касцёла ў Мазыры, імёны святароў, якія там служылі, і заахвоціў да малітвы за памерлых вернікаў, кансэкраваных асобаў і духавенства.

«Сёння, у 310-ю гадавіну пасвячэння касцёла Узвышэння Святога Крыжа ў Мазыры, мы сабраліся на першую ў гэтай святыні святую Імшу пасля доўгага перыяду запусцення і знеслаўлення гэтага месца, — сказаў іерарх. —

Узгадваем і агортваем удзячнай малітвай усіх тых вернікаў, якія будавалі гэты касцёл і цяпер клапоцяцца аб яго адраджэнні».

Біскуп выказаў падзяку дзяржаўным уладам, прыватным арганізацыям і ўсім неабыякавым асобам, якія «прычыніліся да вялікай справы адраджэння духоўнай спадчыны ў Анёльскай даліне Мазыра». Асаблівыя словы ўдзячнасці ён адрасаваў былому шматгадоваму пробашчу мазырскай парафіі Унебаўзяцця Найсвяцейшай Панны Марыі кс. Юзафу Дзяконскаму, а таксама ўсім душпастырам, якія «з не меншай ахвярнасцю працягваюць справу сваіх папярэднікаў».

Таксама іерарх выказаў удзячнасць Богу «за натхненне і сілы, якімі Ён надзяляе вернікаў парафіі», сярод іх асабліва падзякаваўшы Аляксандру Баранаву і кс. Віталію Мысонаву, які паходзіць з гэтай парафіі.

«Сёння, у дзень святога Блажэя, адданага душпастыра і мучаніка, молімся да міласэрнага Бога аб благаслаўленні для Касцёла ў Мазыры, аб аднаўленні гістарычных святынь і аб пабудове новых у новых мікрараёнах горада.Няхай добры Бог спрыяе нам у справе аднаўлення духоўнага жыцця, а Маці Божая Юравіцкая, Апякунка Мазыршчыны, выпрошвае ў Бога неабходныя ласкі», — дадаў пастыр Пінскай дыяцэзіі.

На заканчэнне Імшы біскуп падзякаваў усім прысутным за супольную малітву і благаславіў мазырскіх вернікаў на далейшую працу па адраджэнні іх гістарычнай святыні.

Паводле catholic.by