Category Archives: Важнае

Дапаможны біскуп Пінскай дыяцэзіі Андрэй Зноска прыняў біскупскае пасвячэнне ў Пінску

Posted on by

7 верасня ў катэдральнай базыліцы Унебаўзяцця Найсвяцейшай Панны Марыі ў Пінску адбылося біскупскае пасвячэнне ксяндза каноніка Андрэя Зноскі, якога Папа Францішак прызначыў дапаможным біскупам Пінскай дыяцэзіі.

Галоўным пасвячаючым біскупам стаў Апостальскі нунцый арцыбіскуп Антэ Ёзіч, які завяршае сваё служэнне ў Беларусі і цяпер будзе прадстаўніком Святога Айца ў Грузіі і Арменіі. Яму асіставалі біскуп Пінскі Антоні Дзям’янка і Мітрапаліт Мінска-Магілёўскі арцыбіскуп Юзаф Станеўскі, а таксама біскуп Гродзенскі Аляксандр Кашкевіч, біскуп Віцебскі Алег Буткевіч, каад’ютар Гродзенскай дыяцэзіі біскуп Уладзімір Гуляй,Генеральны вікарый Мінска-Магілёўскай архідыяцэзіі біскуп Юрый Касабуцкі, біскуп Казімір Велікаселец з Гомеля.

Свае віншаванні новапасвячанаму біскупу Зноску даслаў таксама арцыбіскуп эмэрыт Тадэвуш Кандрусевіч, які цяпер знаходзіцца ў Казахстане, дзе бярэ ўдзел у святкаванні юбілею 25-годдзя з часу заснавання Карагандзінскай дыяцэзіі.

На пачатку ўрачыстай святой Імшы, падчас якой адбываліся абрады пасвячэння, была абвешчана намінацыйная була — дакумент Папы Францішка, якім ён прызначыў ксяндза Андрэя Зноску дапаможным біскупам Пінскай дыяцэзіі і тытулярным біскупам Скардоны.

Пераклад папскай булы на беларускую мову прачытаў адзін з асістуючых святароў ксёндз канонік Антоній Казлоўскі, дэкан Смаргонскі.

Святы Айцец, звяртаючыся ў гэтым сваім лісце да Андрэя Зноскі, між іншым, напісаў:

«Пан, які ў сваёй любові паказаў блукаючым святло праўды, каб усе, хто вызнаюць сябе хрысціянамі, маглі вярнуцца на шлях міру і шчыра імкнуліся да таго, што яму спрыяе, паслаў у гэты свет наступнікаў апосталаў, каб яны як мага старанней выконвалі абавязак абвяшчэння Евангелля.

З увагі на тое, што вялебны брат Антоні Дзям’янка, біскуп Пінскай дыяцэзіі лацінскага абраду, прасіў, каб яму быў дадзены дапаможны біскуп, які падтрымаў бы яго сваёй дапамогаю і руплівасцю, і маючы ў сэрцы трывалае дабро Касцёла ў Беларусі, Мы ахвотна схіляемся да ягонай просьбы. Таму Мы мяркуем, умілаваны Сыне, чые чалавечыя і святарскія здольнасці жывяць нашую надзею, што ў гэтай важнай справе ты належна і верна, а менавіта ў згодзе з Біскупам дыяцэзіі, зможаш несці сваё служэнне.

Таму, параіўшыся з Дыкастэрыяй па справах Біскупаў і беручы пад увагу меркаванне Дзяржаўнага Сакратарыяту, Мы ўстанаўліваем цябе Дапаможным біскупам Пінскай дыяцэзіі лацінскага абраду і адначасова мянуем тытулярным біскупам Скардонскім, надаючы ўсе неабходныя правы і ўскладаючы на цябе адпаведныя абавязкі. Што датычыцца твайго біскупскага пасвячэння, то яго ты зможаш прыняць ад каталіцкага біскупа, якога выбярэш, у любым месцы па-за Рымам, з захаваннем літургічных нормаў. Але спярша неабходна, каб ты даў вызнанне веры, а таксама прысягу вернасці Нам і Нашым Наступнікам на гэтым Пасадзе. Нарэшце, умілаваны Сыне, даручаем цябе і тваё служэнне заступніцтву Найсвяцейшай Панны Марыі і Яе Абранніка святога Юзафа, а таксама заклікаем і просім, каб ты навучаў Хрыстовых вернікаў усім сэрцам любіць усемагутнага Бога, імя Якога — любоў (пар. 1 Ян 4, 8), якую Ён нам ясна выявіў ва ўцелаўленні Хрыста, каб у праўдзе Святога Духа, які сапраўды перамяняе аблічча зямлі і свету, падтрыманы ўсімі неабходнымі ласкамі ты прыносіў гэтую любоў у штодзённае жыццё».

Була была падпісана Папам Францішкам 19 ліпеня 2024 года.

Біскуп намінат Андрэй Зноска запрашае на біскупскае пасвячэнне ў Пінск

Posted on by

Біскуп намінат Андрэй Зноска, 19 ліпеня прызначаны Папам Францішкам дапаможным біскупам Пінскай дыяцэзіі, запрашае ў Пінск на біскупскае пасвячэнне, якое адбудзецца 7 верасня.

Дарагія сёстры і браты ў Хрысце, людзі добрай волі!

Вялебныя браты ў святарстве, шаноўныя манаскія асобы!

Як вядома, 19 ліпеня Яго Святасць Папа Францішак ласкава прызначыў мяне на пасаду дапаможнага біскупа Пінскай дыяцэзіі.

Дзякуючы Богу за дар паклікання да паўнаты святарства і ў адзінстве з найдастойнейшым біскупам Антоніем Дзям’янкам, біскупам Пінскім, прагну запрасіць кожную і кожнага з вас прыняць удзел ва ўрачыстай Эўхарыстыі, цэлебрацыю якую узначаліць Апостальскі нунцый арцыбіскуп Антэ Ёзіч, і падчас якой я прыму біскупскае пасвячэнне.

Урачыстасць адбудзецца ў катэдральнай базыліцы Унебаўзяцця Найсвяцейшай Панны Марыі ў Пінску ў суботу 7 верасня а 16-й гадзіне.

У падрыхтоўцы да прыняцця паўнаты святарства даручаю сябе малітвам Божай Маці, праслаўленай у Лагішынскім абразе, і святога мучаніка Андрэя Баболі, Апостала Палесся. Прашу таксама Божы люд, кожнага з вас, сёстры і браты, аб малітве за мяне, каб даручанае мне служэнне выконваў у духу вернасці Богу, Апостальскай Сталіцы і Касцёлу.

Да сустрэчы ў Пінску!

✠ Андрэй Зноска

з ласкі Бога і Апостальскай Сталіцы
тытулярны біскуп Скардоны
дапаможны біскуп Пінскай дыяцэзіі

Катэхетычны каледж у Баранавічах запрашае на святкаванне 15-годдзя яго дзейнасці

Posted on by

21 верасня Катэхетычны каледж імя Зыгмунта Лазінскага ў Баранавічах будзе адзначаць 15-годдзе сваёй плённай дзейнасці. Дзень 3 кастрычніка 2009 года стаў адметнай датай у найноўшай гісторыі Каталіцкага Касцёла на Беларусі. У гэты дзень у Баранавічах афіцыйна распачала сваю дзейнасць першая каталіцкая тэалагічная ўстанова для свецкіх. І хоць ініцыятыва па яе стварэнню сягае пачаткаў 1990-х, то менавіта дзякуючы намаганням кардынала Казіміра Свёнтка, манаскай супольнасці Божага Слова і святароў Пінскай дыяцэзіі – ксяндза Андрэя Рылкі і ксяндза Алега Сількевіча – Катэхетычны каледж не толькі распачаў сваю духоўна-адукацыйную дзейнасць, але і праклаў шлях для паспяховага існавання ў наш час падобных установаў у Мінску і Гродне.

Сёння Катэхетычны каледж у Баранавічах – гэта ўнікальная тэалагічная ўстанова для свецкіх асобаў, дзе кожны жадаючы можа бясплатна на працягу трох гадоў навучання атрымаць грунтоўную тэалагічную адукацыю, а таксама паглыбіць свае веды ў галіне філасофіі, псіхалогіі і рэлігіязнаўства.

На сённяшні дзень у Катэхетычным каледжы ў Баранавічах можна атрымаць адукацыю па наступных спкецыялізацыях:

  1. “Катэхетыка” – прадугледжана для асобаў, якія жадаюць пасля заканчэння ўстановы працаваць у парафіях у якасці катэхета (выкладчыка катэхізіса).

Дадаткова на гэтай спецыялізацыі можна атрымаць наступныя кваліфікацыі:

  • арганізатар літургіі,
  • арганізатар рэлігійнага турызму і адпачынку,
  • супрацоўнік каталіцкіх СМІ.
  • “Агульная тэалогія” – прадугледжана для асобаў, якія жадаюць паглыбіць сваю веру і веды, вывучаючы каталіцкую тэалогію.
  • “Сямейнае кансультаванне” – прадугледжана для асобаў, якія жадаюць на прафесійным узроўні дапамагаць душпастырам у вырашэнні разнастайных духоўных і маральных пытанняў, звязаных з сужэнскім і сямейным жыццём вернікаў.
  • “Кансультаванне ў галіне залежнасцяў”  – прадугледжана для асобаў, якія жадаюць на прафесійным узроўні дапамагаць душпастырам у вырашэнні разнастайных духоўных і маральных праблем, звязаных з разнастайнымі залежнасцямі і сузалежнасцямі.

Пры гэтай тэалагічнай установе дзейнічае ўнікальны для Беларусі “Музей Бібліі”, дзе кожны жадаючы можа наглядна і падрабязна пазнаёміцца з гісторыяй паўставання, захавання і перадачы з пакалення ў пакаленне тэкстаў Святога Пісання.    

7 верасня ў Катэхетычным каледжы ў Баранавічах адбудзецца ўступны экзамен. Усе хто, жадае паглыбіць свае веды ў галіне Святога Пісання, тэалогіі, дапамогі людзям у іх духоўных і маральных клопатах, а таксама пазнаць таямніцы хрысціянскай веры, могуць падрабязна пазнаёміцца з умовамі навучання на інтэрнет-старонцы каледжа: https://catcollege.by/ або па тэлефоне сакратарыяту гэтай установы: +375 (163) 57-93-14,
+375 (29) 513 57 92 (МТС).

Дырэкцыя Катэхетычнага каледжа запрашае ўсіх студэнтаў, выкладчыкаў, выпускнікоў і сяброў гэтай установы на супольную святую Імшу падзякі за 15 год яе паспяховай дзейнасці. Святая Імша адбудзецца 21 верасня а 16.00 у капліцы каледжа (г. Баранавічы, вул. Т. Шаўчэнкі, 6).

Кс. А. Рылка   

Паведамленне

Posted on by

Біскупа Пінскага Антонія Дзям’янкі з нагоды пасвячэння дапаможнага біскупа і распачацця святкавання 100-ай гадавіны заснавання Пінскай дыяцэзіі

Да вернікаў Пінскай дыяцэзіі

Умілаваныя ў Хрысце браты і сёстры, людзі добрай волі!

У ліпені бягучага года Святы Айцец Францішак прызначыў дапаможнага біскупа для нашай Пінскай дыяцэзіі. Мы ўдзячныя Яго Святасці за гэтае прызначэнне асабліва цяпер, калі Паўсюдны Касцёл рыхтуецца да Юбілею Адкуплення ў наступным годзе, а наш мясцовы Касцёл неўзабаве распачне святкаванне сотай гадавіны заснавання Пінскай дыяцэзіі.

Мы дзякуем Святому Айцу Францішку за яго служэннне і ўвагу да патрэбаў Касцёла на нашай зямлі. Дзякуючы Добраму Богу за дар Пантыфіка, узносім таксама малітву падзякі за плённую працу ў Беларусі Апостальскага Нунцыя Арцыбіскупа Антэ Ёзіча, які завяршае сваю місію ў нашай краіне. Молімся аб далейшым Божым благаслаўленні для яго на новым месцы служэння.

Запрашаю ўсіх вернікаў дыяцэзіі і ўсіх людзей добрай волі да ўдзелу ў біскупскім пасвячэнні Яго Эксцэленцыі Андрэя Зноскі, якое адбудзецца 7 верасня а 16.00 у Пінскім катэдральным касцёле. Прашу таксама ўсіх душпастыраў, каб у бліжэйшыя нядзелі 1 і 8 верасня падчас кожнай святой Імшы ў Малітве вернікаў узнеслі да Усемагутнага Бога просьбу аб неабходных дарах і ласках для новага дапаможнага біскупа нашай дыяцэзіі, каб яго служэнне прыносіла шчодрыя плёны.   

Запрашаю таксама да ўдзелу ва ўрачыстым распачацці святкавання юбілею 100-годдзя Пінскай дыяцэзіі, якое адбудзецца 28 верасня ў Ружанах. Урачыстасць распачаннецца а 11.00 гадзіне са святой Імшы з пасвячэннем адноўленай гістарычнай капліцы святога Казіміра ў гэтым мястэчку і працягнецца ў мясцовым парафіяльным касцёле Найсвяцейшай Тройцы. Падрабязная праграма ўрачыстасці будзе апубулікавана ў бліжэйшы час на інтэрнет-старонках: pcd.by, catholic.by, а таксама на дошцы аб’яваў каля кожнага касцёла і капліцы ў нашай дыяцэзіі.       

З пастырскім благаслаўленнем,

+ Антоні Дзям’янка

      Біскуп Пінскі

Пінск, 26 жніўня 2024 г.

Фэст Маці Божай Каралевы Палесся адбыўся ў Лагішыне на Піншчыне з удзелам іерархаў і біскупа наміната

Posted on by

9 і 10 жніўня ў мястэчку Лагішын (Пінская дыяцэзія) адбыўся традыцыйны фэст Маці Божай Лагішынскай Каралевы Палесся.

Асаблівымі ўдзельнікамі ўрачыстасці штогод з’яўляюцца шматлікія групы пілігрымаў, якія прыходзяць пешшу і прыязджаюць на транспартных сродках з розных куткоў Пінскай дыяцэзіі і ўсёй Беларусі, каб разам з сабранымі вернікамі даверыць Пану Богу свае малітоўныя інтэнцыі перад цудадзеным абразом Маці Божай.

Урачыстае перажыванне фэсту распачалося прывітаннем шматлікіх пілігрымаў, якія на працягу ўсяго дня 9 жніўня, як ручаінкі, збягаліся да лагішынскага санктуарыя Багародзіцы. Асабліва чаканымі ўдзельнікамі фэсту заўсёды становяцца вялікія групы пешых пілігрымаў з Баранавічаў і Бярозы, якія на працягу чатырох дзён вандруюць, перажываючы «рэкалекцыі ў дарозе», да галоўнага санктуарыя Пінскай дыяцэзіі.

У гэтым годзе больш за дзве сотні паломнікаў з Бярозы і паўтары сотні з Баранавічаў прыйшлі пешшу да Маці Божай Лагішынскай, давяраючы Ёй свае малітоўныя інтэнцыі, а таксама тых, хто прасіў іх аб малітве ў дарозе і перад абліччам Каралевы Палесся.

Цэлебрацыю ўрачыстай святой Імшы 9 жніўня ўвечары ўзначаліў дапаможны біскуп Пінскай дыяцэзіі Казімір Велікаселец ОР. Разам з ім літургію цэлебраваў біскуп Пінскі Антоні Дзям’янка, Апостальскі адміністратар для грэка-католікаў Беларусі архімандрыт Сяргей Гаек, святары з розных парафій Пінскай дыяцэзіі і іншых дыяцэзій Беларусі.

Біскуп Дзям’янка на пачатку святой Імшы запрасіў вернікаў асабліва памаліцца і даверыць далейшай апецы Маці Божай біскупа Велікасельца, які сёлета адзначае юбілей 25-годдзя плённага і самаахвярнага біскупскага служэння.

Гамілію да сабраных пілігрымаў скіраваў ксёндз Алег Грыгаровіч SAC, пробашч прафіі Святога Казіміра і Маці Божай Каралевы ў Жлобіне. Святар запрасіў вернікаў паразважаць, стоячы перад цудадзейным абразом Маці Божай Лагішынскай, аб сваёй любові і адказнасці за Касцёл як супольнасць Божых дзяцей.

Пасля завяршэння святой Імшы адбылася традыцыйная малітоўная працэсія са свечкамі і копіяй абраза Каралевы Палесся вакол санктуарыя.

Працягам чування ў гонар Маці Божай стаў музычны канцэрт праслаўлення, а ў касцёле не змаўкала малітва начнога чування вернікаў на адарацыі Найсвяцейшага Сакрамэнту каля цудатворнай іконы.

Цэнтральным момантам другога дня фэсту 10 жніўня стала святая Імша, цэлебрацыю якой узначаліў біскуп Пінскі Антоні Дзям’янка. У цэлебрацыі бралі ўдзел таксама біскуп Велікаселец, архімандрыт Гаек, сакратар Апостальскай Нунцыятуры ў Мінску ксёндз прэлат Кшыштаф Сэрока, канцлер курыі Пінскай дыяцэзіі і кіраўнік пілігрымкі з Баранавічаў ксёндз Андрэй Рылка, пробашч прафіі Найсвяцейшай Тройцы ў Бярозе і кіраўнік пілігрымкі з Бярозы ксёндз Уладзімір Буклярэвіч SAC, а таксама шматлікія святары з Пінскай дыяцэзіі і іншых дыяцэзій Беларусі.

Вялікай радасцю для сабраных стала прыбыццё ў санктуарый новаменаванага дапаможнага біскупа Пінскай дыяцэзіі ксяндза каноніка Андрэя Зноскі.

Звяртаючыся да шматлікіх вернікаў, сабраных з розных куткоў Пінскай дыяцэзіі, біскуп намінат папрасіў іх аб малітоўнай падтрымцы і запрасіў да ўдзелу ва ўрачыстасцях яго біскупскага пасвячэння, якое запланавана на 7 верасня а 16-й гадзіне ў пінскай катэдральнай базыліцы Унебаўзяцця Найсвяцейшай Панны Марыі.

Гамілію падчас Імшы прамовіў ксёндз Станіслаў Вашкевіч SAC з Бярозы. Святар звярнуў увагу сабраных на дзейсную прысутнасць Маці Божай як у асноўныя моманты жыцця Хрыста, Яго вучняў, так і ў жыцці ўсяго Касцёла.

Біскуп Дзям’янка на завяршэнне святой Імшы нагадаў вернікам, што 28 верасня ў Ружанах Пінская дыяцэзія распачне святкаванне юбілею 100-годдзя яе заснавання.

Гэты надыходзячы знакавы год дыяцэзія жадае перажываць у лучнасці з Вялікім юбілеем Адкуплення, які будзе адзначаць паўсюдны Касцёл на працягу ўсяго 2025 года.

На заканчэнне ўрачыстасці пробашч парафіі і кусташ санктуарыя ў Лагішыне ксёндз Андрэй Шут запрасіў усіх пілігрымаў да актыўнага ўдзелу ў наступных традыцыйных пілігрымках да Маці Божай Лагішынскай, якія плануюцца ў юбілейным 2025 годзе: з Пінска — 10 мая, з Баранавічаў і Бярозы — 5–8 жніўня. Фэст Каралевы Палесся ў 2025 годзе адбудзецца 8 і 9 жніўня.

Праграма ўрачыстасцяў у санктуарыі Маці Божай Каралевы Палесся ў Лагішыне

Posted on by

З 6 па 9 жніўня у Пінскай дыяцэзіі адбудуцца традыцыйныя пешыя пілігрымкі з Баранавічаў і Бярозы у санктуарый Маці Божай у Лагішыне (Пінскі р-н). На заканчэнне пілігрымак у санктуарыі адбудзецца Фэст Каралевы Палесся.

Праграма Лагішынскага Фэста: 

9 жніўня:

  • 18.00 – прывітанне пілігрымаў;
  • 19.00 – 21.00 – адарацыя Найсвяцейшага Сакрамэнту перад цудадзейным абразом Маці Божай, магчымасць споведзі;
  • 21.00 – Акафіст на ўшанаванне Маці Божай (грэка-каталіцкая супольнасць);
  • 22.00 – урачыстая святая Імша з удзелам пілігрымаў;
  • Пасля св. Імшы:
    • малітоўная працэсія са свечкамі вакол санктуарыя Маці Божай;
    • канцэрт праслаўлення пілігрымаў з удзелам музычнай супольнасці “Рыбы”;
    • усяночнае малітоўнае чуванне перад цудадзейным абразом Маці Божай, магчымасць споведзі.


10 жніўня:

  • 7.30 – Гадзінкі аб Беззаганным Зачацці Найсвяцейшай Панны Марыі;
  • 8.00 – святая Імша;
  • 10.00 – урачыстая святая Імша з удзелам пілігрымаў;
  • 12.00 – благаслаўленне пілігрымаў.

 

Больш падрабязную інфармацыю можна атрымаць праз наступныя кантакты:
Пілігрымка Баранавічы-Лагішын: +375 29 325 84 89 (Таццяна);
Пілігрымка Бяроза-Лагішын: +375 29 790 80 16
(кс. Уладзімір);
Фэст у Лагішыне: +375 29 726 83 79 (кс. Андрэй, пробашч)

ПАВЕДАМЛЕННЕ Яго Эксцэленцыя Антоні Дзям’янка Біскуп Пінскі

Posted on by

з нагоды малітоўнай падрыхтоўкі да прысвячэння
Найсвяцейшаму Сэрцу Езуса Пінскай дыяцэзіі
і Мінска-Магілёўскай Мітраполіі

Да вернікаў Пінскай дыяцэзіі

Умілаваныя ў Хрысце браты і сёстры!

Далучаючыся да закліка Мітрапаліта Мінска-Магілёўскага Арцыбіскупа Юзафа Станеўскага, каб скіраваць да Пана Бога малітву падзякі за нястомную апеку Маці Божай над Касцёлам у нашай краіне, а таксама за шчодрасць атрыманых ласкаў ад Пана, запрашаю ўсіх вернікаў Пінскай дыяцэзіі да ўдзелу ва ўрачыстасцях у нацыянальным санктуарыі Маці Божай Будслаўскай 5-6 ліпеня 2024 г., падчас якіх будзе здзейснены малітоўны акт прысвячэння ўсяго Каталіцкага Касцёла на Беларусі Найсвяцейшаму Сэрцу Езуса з нагоды 125-годдзя прысвячэння Яму ўсяго чалавецтва Папам Львом ХІІІ.

Як чытаем у Пасланні Мітрапаліта, “гэтае прысвячэнне …. ўсяго Каталіцкага Касцёла на Беларусі Найсвяцейшаму Сэрцу Езуса стане падзякай за атрыманыя ласкі, перапрашэннем і ўміласціўленнем за ўчыненыя грахі, просьбай аб умацаванні веры і любові, каб мы заставаліся вернымі Евангеллю, вернымі нашаму Збаўцу Езусу Хрысту, нягледзячы на новыя выклікі і выпрабаванні.

У Акце інтранізацыі будзем прасіць аб еднасці ў нашых сем’ях і іх аднаўленні, каб яны былі асяродкамі любові і міру, свабоднымі ад здрады, агрэсіі і насілля, адкрытымі для новага жыцця і здольнымі перадаваць веру і традыцыю продкаў новым пакаленням. Будзем прысвячаць Найсвяцейшаму Сэрцу Езуса нашую моладзь, каб яна знаходзіла сэнс жыцця і ішла за голасам Бога, каб сэрцы маладых людзей палалі любоўю да Збаўцы, каб іх энтузіязм і вера аднаўлялі Касцёл” (гл. Пасланне Арцыбіскупа Ю. Станеўскага, 02.07.2023 г.).

Таксама падчас сёлетняга святкавання ўрачыстасці Найсвяцейшага Сэрца Езуса, 7 чэрвеня 2024 года, заахвочваю душпастыраў і ўсіх вернікаў кожнай парафіі здзейсніць урачыстае прысвячэнне Найсвяцейшаму Сэрцу Езуса сябе асабіста, сужэнствы і сем’і, парафіі і разнастайныя супольнасці мясцовага Касцёла.

Акрамя таго, заахвочваю ўсіх вернікаў, каб падчас урачыстасці Найсвяцейшага Сэрца Езуса ўзнесці да Бога малітву падзякі і просьбу аб шчодрым благаслаўленні для ўсіх дабрадзеяў і ахвярадаўцаў, для кожнай асобы, якая падтрымлівае Хрыстовы Касцёл на нашай зямлі духоўна і матэрыяльна. 

Няхай гэтыя асаблівыя дні малітвы і ўшанавання Найсвяцейшага Сэрца Езуса, калі мы ўзгадваем 125-годдзе прысвячэння Яму ўсяго чалавецтва, дапамогуць вернікам Касцёла ў нашым рэгіёне з яшчэ большай руплівасцю падрыхтавацца да святкавання вялікага юбілею Адкуплення, а таксама сотай гадавіны паўстання Пінскай дыяцэзіі.   

З пастырскім благаслаўленнем,

✠ Антоні Дзям’янка

Біскуп Пінскі

Пінск, 5 чэрвеня 2024 г.

Пастырскі ліст Біскупа Пінскага Антонія Дзям’янкі на Звычайны перыяд 2024 г. Аб эўхарыстычнай пабожнасці ў Пінскай дыяцэзіі

Posted on by

Да вернікаў Пінскай дыяцэзіі

Шаноўныя святары, душпастыры Пінскай дыяцэзіі, умілаваныя ў Хрысце кансэкраваныя асобы і свецкія вернікі!

Пінская дыяцэзія перажывае асаблівы час падрыхтоўкі да юбілею сотай гадавіны з даты яе заснавання. Уваходзім у перыяд летняга сезона, які звычайна характарызуецца дынамізмам і большай актыўнасцю чалавечай асобы. Пераважна ў гэты час займаемся рамонтамі, будаўніцтвам, працуем у полі і часцей вырушаем у падарожжы, каб наведаць нашых родных і знаёмых, а таксама каб затрымацца ля магілы блізкіх нашаму сэрцу памерлых. Найчасцей летам арганізоўваем адпачынак з сям’ёй, удзельнічаем у пілігрымках і выездах, наведваем цікавыя мясціны ў сваёй краіне і замежжы.

Аднак важна памятаць, што ў большасці месцаў, якія наведваем з розных прычын, знаходзяцца таксама каталіцкія святыні, якія мы, як веруючыя асобы, не можам бесклапотна прамінуць. Ёсць такая старажытная хрысціянская прыказка: «Спярша пакланіся Богу ў касцёле, пасля — плябану і ўрэшце — гаспадару». Таму, дарагія браты і сёстры, жадаю скіраваць да вас гэты ліст, каб заахвоціць вас наведваць святыні і не шкадаваць часу на адарацыю Найсвяцейшага Сакрамэнту падчас вашых летніх выездаў, падарожжаў і экскурсій.

Часам вернікі, наведваючы касцёл з нейкай групай падчас экскурсій, забываюць прывітаць Пана Езуса і, такім чынам, не даюць сведчання сваёй веры. Нагадваю пра годны захавання звычай, паводле якога, увайшоўшы ў святыню, вызнаём нашую веру ў Хрыста, прысутнага ў Найсвяцейшым Сакрамэнце, выражаючы нашую пашану адпведнай малітоўнай паставай цела. У такую хвіліну паўтараем адзін з традыцыйна прынятых малітоўных заклікаў: «Няхай будзе праслаўлены Найсвяцейшы Сакрамэнт, сапраўднае Цела і Кроў Пана нашага Езуса Хрыста!» Або: «Божа, злітуйся нада мною, грэшным!» Або: «Езусе, Сыне Давіда, злітуйся нада мною!»  Далей сустрэчу з Езусам варта працягнуць, молячыся Ружанец, Вяночак да Божай Міласэрнасці або іншую малітву. Было б непаразуменнем, калі б мы захапляліся прыгажосцю архітэктуры і мастацтва нашых святынь, а пры гэтым забывалі пра іх Гаспадара. Належыць таксама памятаць, што за наведванне Найсвяцейшага Сакрамэнту пры выкананні звычайных умоў можам атрымаць частковы адпуст, а пры адарацыі, прынамсі, паўгадзіны — поўны адпуст.

Здараецца, што асобы, якія наведваюць касцёл, маюць патрэбу ў духоўнай паслузе святара, часам прыбываючы з мясцовасці, дзе няма ўласнай парафіяльнай святыні. У такіх выпадках неабходна прасіць мясцовага душпастыра аб святарскай паслузе. Каб забяспечыць магчымасць сустрэчы з духоўнай асобай, пры святынях размешчаны яе кантактны нумар тэлефона.

Спрадвеку было вядома на нашай зямлі, што галоўным будынкам у кожнай мясцовасці з’яўляецца святыня. Таму касцёлы найчасцей будаваліся ў цэнтры нашых гарадоў і вёсак на найбольш годным і бачным месцы. У цяперашнія часы, паспешна пераадольваючы вялікія адлегласці з мэтай вырашэння нашых штодзённых спраў, мы часта за адзін дзень можам пабываць і ў краме, і ў шпіталі, на месцы вучобы і працы, на рынку і месцах адпачынку. Важна пры ўсім гэтым не забыць пра касцёл. Ці Божы дом надалей застаецца галоўным будынкам для нас у нашых гарадах і вёсках? Праўда, што сучасны чалавек не можа нармальна функцыянаваць без аптэкі, банка, крамы ці адміністрацыйных устаноў. Але нельга дазваляць паглынуць сябе толькі часовым справам. Поўня хрысціянскага жыцця немагчымая без наведвання касцёла.

Мы жывём у свеце, у якім часта перажываем разнастайныя цяжкасці, часам сустракаемся з рознымі выпрабаваннямі лёсу. У такіх сітуацыях не можам паддавацца безнадзейнасці, дэпрэсіі ці шукаць часовага суцяшэння ў граху ці пустых занятках. Кожны крызіс нашага жыцця, кожны боль або нечаканае няшчасце павінна станавіцца нагодай, каб услед за Пятром, які тануў, моцна ўсклікнуць да Езуса: «Пане, ратуй мяне!» (Мц 14, 30). У цяжкія хвіліны нашага жыцця, браты і сёстры, не забывайма стаць перад Панам на адарацыі, у пакорнай малітве шукаючы збаўлення.

Асабліва заахвочваю вернікаў, якія нясуць крыж уласнай хваробы, памятаць пра спецыяльную моц, якою надзяляе Хрыстус у святых сакрамэнтах. Перад тым як пайсці ў шпіталь, перад неабходнымі медыцынскімі працэдурамі наведвайце касцёл, карыстайцеся аздараўляючай ласкай святых сакрамэнтаў і размовай з Лекарам нашых душ і цел, утоеным у Эўхарыстычным Хлебе. Маем столькі сведчанняў хворых асоб, якія распавядаюць аб моцным аздараўляючым дзеянні Пана Езуса ў часе адарацыі Найсвяцейшага Сакрамэнту!

Асабліва прашу бацькоў, каб наведвалі касцёл са сваімі дзецьмі і разам з імі адаравалі там Хрыста ў Найсвяцейшым Сакрамэнце. Дарагія бацькі, ідучы са сваімі дзецьмі па вуліцах нашых гарадоў і вёсак у розныя месцы, дзе тыя вучацца і адпачываюць, не забудзьце пра галоўнае месца, у якім ваш сын ці дачка зможа навучыцца дыялогу з Богам. Пры кожнай адпаведнай нагодзе заходзьце са сваімі дзецьмі ў касцёл. У залежнасці ад умоў пражывання дзеці не заўсёды маюць доступ да святыні і часам могуць дабрацца туды толькі з дапамогай бацькоў. Таму яшчэ раз моцна заахвочваю бацькоў, каб усім сэрцам адгукнуліся на заклік Хрыста: «Дазвольце дзецям прыходзіць да Мяне, не забараняйце ім, бо такім належыць Валадарства Божае» (Мк 10, 14). Пан Езус сапраўды хоча бачыць вашых дзяцей!

Сучасны чалавек адкрыты на ўсё, што новае, і ахвотна прымае найноўшыя дасягненні тэхнічных вынаходніцтваў, якія паляпшаюць яго жыццё. У кожным горадзе ў апошнія часы назіраем хуткае развіццё разнастайных магчымасцей карыстання электрычнымі роварамі і самакатамі. Ці ж не становіцца гэта добрай нагодай для многіх з нас яшчэ прасцей даязджаць да нашых касцёлаў? Няхай жа вынаходніцтвы сучаснай урбаністычнай культуры служаць не толькі нашай працы і адпачынку, але таксама дапамагаюць у паглыбленні нашага духоўнага жыцця.

У традыцыі Касцёла мы знаходзім шматлікія формы эўхарыстычнай пабожнасці: працэсіі, святыя гадзіны, саракагадзінныя набажэнствы, эўхарыстычныя кангрэсы, выстаўленне Найсвяцейшага Сакрамэнту і інш. Нашая Пінская дыяцэзія займае шырокія абшары, і,  як ведаем, нам не хапае адпаведнай колькасці душпастыраў, у выніку чаго святары не раз павінны пераадольваць вялікія адлегласці, каб даехаць да давераных іх апецы вернікаў. Не заўсёды ёсць магчымасць арганізаваць у паасобных парафіях набажэнствы, якія маглі б развіваць Эўхарыстычны культ. Таму ў гэтым пастырскім лісце заахвочваю да практыкі наведвання Найсвяцейшага Сакрамэнту. Гэта адзін з магчымых і даступных у кожнай парафіі спосабаў ушанавання Пана Езуса, прысутнага ў Эўхарыстыі.  Спадзяюся, што гэтая пабожная практыка будзе прынята і падтрымана. У тых парафіях, дзе існуе магчымасць арганізацыі ўзгаданых форм культу Эўхарыстыі, горача да гэтага заахвочваю.

У разважаннях пра нашую эўхарыстычную пабожнасць нельга абмінуць тэмы, якая датычыць знешніх праяўленняў пашаны веруючай асобы да Пана Езуса, прысутнага ў Найсвяцейшым Сакрамэнце: нашае адзенне. Ці не сведчыць яно пра нашую ўнутраную паставу? Памятаем звычаі нашых продкаў, якія заўсёды апраналіся ў найлепшае адзенне, ідучы ў касцёл, бо яны сапраўды верылі, што ідуць на сустрэчу з жывым Богам. Хачу нагадаць як мужчынам, так і жанчынам, як дзецям, так і моладзі, што нашая вопратка, у якой прыходзім у касцёл, павінна быць ва ўсіх сэнсах прыстойная. Усе разумеем, што ў будныя дні мы можам прыходзіць у святыню непасрэдна пасля працы або пасля разнастайных заняткаў нашай паўсядзённасці. Але ці нядзеля або ўрачыстасць не з’яўляюцца важнай нагодай, каб мы маглі адзначыць гэты асаблівы час ласкі, таксама апрануўшыся ў святочнае адзенне?

Як было ўзгадана на пачатку гэтага ліста, летні перыяд з’яўляецца часам адведзін і прыгожых сяброўскіх спатканняў. Аднак, наведваючы блізкіх нам асоб, не забывайма пра нашага найлепшага Сябра — Пана Езуса. У тым месцы, куды прыязджаеце, магчыма, таксама ёсць касцёл, гэта значыць дом вашага найбліжэйшага Сябра, якога нельга абмінуць. Пры такой нагодзе маем магчымасць засведчыць сваю веру перад тымі асобамі, якія нас прымаюць ці сярод якіх мы знаходзімся. Не бойцеся патлумачыць ім пра мэту нашага наведвання касцёла, распавядайце ім пра нашыя адносіны з жывым Хрыстом, якога адаруем у Найсвяцейшым Сакрамэнце. Часам мы можам цэлы дзень весці гутарку з асобамі, якіх называем сябрамі, не шкадуем часу на размовы са знаёмымі. Ці сапраўды ў нас не знойдзецца некалькі хвілін, каб зайсці ў касцёл, калі ёсць такая магчымасць?

«Благаславі, душа мая, Пана! Пане, Божа мой, Ты вельмі вялікі» (Пс 103). Гэтымі словамі натхнёны аўтар запрашае нас да адарацыі нашага Стварыцеля і Даўцы жыцця. Узгадваем 103-і псальм, які заахвочвае нас медытаваць над аб’яўленнем Бога ў свеце прыроды, якая паказвае нам веліч Яго стварэння: апранутыя ў зелень лугі і палі, гнёзды буслоў і норы дзікіх звяроў, заход сонца і прыгажосць месяца. Ад ранішняй вясны да позняй восені мы захапляемся прыгажосцю прыроды, падараванай нам Стварыцелем свету. Вучымся заўважаць сляды нашага Нябеснага Айца ў кветках ранняй вясны і лета, тых, што растуць на дзікіх палях і ў нашых садах. Увесь створаны свет — гэта святыня Бога Стварыцеля. Яе прыгажосць адкрываем, сузіраючы ўсё з верай у нашага Пана. Таму касцёл і малітва ў ім не могуць станавіцца для нас перашкодай у тым, каб адначасова захапляцца хараством лета. Наадварот, Пан Езус адкрывае нам вочы, паказваючы прыгажосць таго, што Ён нам даў. Таму мы прыносім у касцёл кветкі і вяночкі, каб падкрэсліць сувязь паміж Богам, якога адаруем, і дарам Яго стварэння.

            Дарагія браты і сёстры! Гэты ліст хачу скончыць, узгадваючы пасланне Святога Айца Францішка, якое ён скіраваў 5 лютага 2018 года да духавенства Рыма, просячы таксама нас: «Вучыце вашых вернікаў адарацыі, бо, адаруючы, мы ўжо тут адчуваем тое, што з Божай ласкі атрымаем у небе». На завяршэнне гэтага разважання Папа ўзгадвае цара Саламона, які маліўся ў святыні, і навучае, якой павінна быць нашая адарацыя: «Саламон адважыўся прамовіць толькі два словы: пачуй і прабач. Гэта два словы адарацыі: пачуй і прабач. Што можна сказаць Пану, калі маем за плячыма ўсё нашае жыццё? Толькі адаруючы і просячы Бога: пачуй і прабач!»

Умілаваныя браты і сёстры! Рыхтуючыся да юбілею Адкуплення ў Паўсюдным Касцёле, а таксама да сотай гадавіны паўстання Пінскай дыяцэзіі, адновім жа ў нашых парафіях і сем’ях вельмі глыбокі пабожны звычай нашых продкаў, каб як найчасцей сустракацца з Езусам Хрыстом на адарацыі Найсвяцейшага Сакрамэнту ў нашых касцёлах.

З пастырскім благаслаўленнем,

+ Антоні Дзям’янка

       Біскуп Пінскі

Пінск, 27 мая 2024 г.

Шаноўныя святары няхай паводле ўласнага душпастырскага меркавання падчас кожнай Св. Імшы ў нядзелю 2 ці 9 чэрвеня або абвесцяць гэты ліст вернікам, або выкарыстаюць яго змест у гаміліі, а таксама размесцяць яго тэкст на дошцы аб’яў перад касцёлам да першай нядзелі Адвэнту (01.12.2024 г.). 

Паведамленне Біскупа Пінскага Антонія Дзям’янкі з нагоды круглай гадавіны пасвячэнняў біскупа Казіміра Велікасельца OP

Posted on by

Да вернікаў Пінскай дыяцэзіі

         Умілаваныя ў Хрысце браты і сёстры!

    У сувязі з надыходзячай круглай датай 40-годдзя святарскага пасвячэння Яго Эксцэленцыі Казіміра Велікасельца OP, Дапаможнага Біскупа Пінскай дыяцэзіі,  і 25-гадовым юбілеем яго біскупскага служэння заклікаю ўсіх жадаючых прыняць удзел ва ўрачыстай Святой Імшы падзякі Пану Богу, якую плануем цэлебраваць у санктуарыі галоўнага нябеснага заступніка Пінскай дыяцэзіі — святога Андрэя Баболі ў Іванаве 18 мая а 12:00.

    Набліжаючыся да сярэбранага юбілею — 25-годдзя служэння біскупа Казіміра, разам з ім дзякуем Добраму Богу за плённыя і шматлікія гады яго святарскага і біскупскага служэння. За гэты доўгі перыяд руплівага пастырскага служэння ён, будучы паслухмяным Божаму Провіду, працаваў на Божай ніве не толькі ў Пінскай дыяцэзіі, але таксама ў Мінска-Магілёўскай архідыяцэзіі, дзе аднавіў парафіі ў Новым Свержні і Гарадзеі, і клапаціўся таксама пра адраджэнне парафіяльных супольнасцей на прылеглых тэрыторыях Гродзенскай дыяцэзіі — у Міры і Карэлічах.

    Сорак гадоў таму сваё святарскае служэнне біскуп Казімір распачынаў у парафіі ў Ішкалдзі каля Баранавіч. Пасля служыў у Паланечцы, Сталовічах, Гарадзішчы, Юшкавічах, Ганцавічах, Лунінцы. У часы адраджэння Касцёла пасля дзесяцігоддзяў атэізму гэты іерарх дапамагаў вернікам у аднаўленні парафій і адбудове зруйнаваных касцёлаў, арганізоўваў з вернікамі новыя парафіі і не перастае клапаціцца пра будаўніцтва новых святынь, якія ўзводзяцца замест раней разбураных. Сярод іх варта ўзгадаць касцёл Маці Божай Анёльскай у в. Лясной каля Баранавіч.

    Служачы ў г. Баранавічы, Яго Эксцэленцыя клапаціўся пра існуючыя там парафіі, пабудаваў новы парафіяльны дом пры касцёле Узвышэння Святога Крыжа. Таксама дапамагаў вернікам у заснаванні новых супольнасцей у маладых мікрараёнах. Так, дзякуючы старанням біскупа Казіміра на пачатку 1990-х гг. паўстала і паспяхова развіваецца парафія Святога Зыгмунта ў гэтым горадзе.

   Таксама, служачы ў Брэсце, Яго Эксцэленцыя прычыніўся да арганізацыі маладой парафіі і распачаў будаўніцтва касцёла Святога Юзафа ў новай частцы горада. Дзякуючы старанням біскупа Казіміра, у касцёле Узвышэння Святога Крыжа ў Брэсце былі адноўлены каменныя алтары, упарадкаваны прыкасцёльная тэрыторыя і агароджа святыні. Тут ён развіваў культ Маці Божай Брэсцкай, устанавіў арган. Іерарх дапамог парафіяльнай супольнасці ў Маларыце арганізаваць новае месца культу і душпастырства замест разбуранай раней святыні.

   Пасля плённага перыяду пастырства ў Брэсце біскуп Казімір працягнуў сваё служэнне ў Пінску. Дзякуючы яго старанням развівалася душпастырства ў Пінскай катэдральнай парафіі. У г. Століне пры падтрымцы гэтага пастыра мясцовая парафія змагла арганізаваць новае месца культу замест разбуранай раней святыні. Таксама Яго Эксцэленцыя служыў супольнасці Міждыяцэзіяльнай вышэйшай духоўнай семінарыі ў Пінску, дзе быў спаведнікам семінарыстаў.

    З 2012 г. біскуп Казімір служыць у Гомелі. У гэтым другім па велічыні горадзе краіны ён дапамог адрадзіцца парафіі Унебаўзяцця Найсвяцейшай Панны Марыі і паспяхова распачаць будаўніцтва новай святыні замест разбуранай у часы атэізму. Там жа Яго Эксцэленцыя служыць не толькі парафіяльным супольнасцям, падтрымлівае святароў, але і духоўна суправаджае сясцёр з манаскіх супольнасцей, а таксама давераных іх апецы асоб з цэнтра дапамогі бяздомным і сем’ям дзяцей з асаблівасцямі развіцця. 

   У Пінскай дыяцэзіі біскуп Казімір на працягу некалькіх дзесяцігоддзяў з’яўляецца Генеральным Вікарыем, дапамагае кіруючаму біскупу ў вырашэнні спраў Касцёла. Яго сведчанне руплівага душпастыра прынесла шчодры плён новых святарскіх пакліканняў у розных парафіях не толькі Пінскай дыяцэзіі, але і ва ўсёй Беларусі. Прыклад веры і малітвы Яго Эксцэленцыі з’яўляецца натхненнем для біскупаў, святароў, кансэкраваных асоб і свецкіх вернікаў да больш адданага жыцця паводле веры.

   Заахвочваю ўсіх святароў, кансэкраваных асоб і свецкіх вернікаў да ўдзелу ў Святой Імшы падзякі ў санктуарыі Святога Андрэя Баболі. Асабліва запрашаю на супольнае набажэнства ўсіх тых, хто з рук Яго Эксцэленцыі быў ахрышчаны, прыступаў да святой споведзі, прымаў Святую Камунію, сакрамэнт канфірмацыі, заключаў сужэнства, атрымліваў духоўную падтрымку.    

   Няхай нашая супольная малітоўная сустрэча 18 мая ў Іванаве стане не толькі падзякай Пану Богу за шматгадовае руплівае служэнне біскупа Казіміра Велікасельца OP, але таксама просьбай да Хрыста — Добрага Пастыра аб новых пакліканнях да святарскага і манаскага служэння і асабліва з парафій Пінскай дыяцэзіі.        

З пастырскім благаслаўленнем,

+ Антоні Дзям’янка

      Біскуп Пінскі

Пінск, 23 красавіка 2024 г.

Шаноўныя святары няхай абвесцяць гэтае Паведамленне вернікам у нядзелю 28 красавіка падчас кожнай Святой Імшы і размесцяць яго тэкст на прыкасцёльнай дошцы аб’яў да 19 мая.